Японияда КХДР билан савдода гумон қилинган компания офисларида тинтув ўтказилди

Япония полицияси 14 декабрь, пайшанба куни M-Create компаниясининг Токиода жойлашган офисида, шунингдек, унинг бир қатор филиалларида тинтувлар ўтказди. «ТАСС»нинг хабар беришича, компания қонунларда белгиланган тақиқларга зид ўлароқ, КХДРга маҳсулот етказиб берганликда гумон қилинмоқда.

Kyodo агентлиги маълумотларига кўра, бунда гап озиқ-овқат ва бошқа турдаги маҳсулотлар экспорти ҳақида бормоқда. M-Create фирмаси 2007 йилда ташкил этилган бўлиб, асосан тамаки қолдиқларини автоматик тўпловчи қурилмаларни ишлаб чиқаришга ихтисослашган.

Бундай қурилмалар одатда Японияда машҳур саналадиган «патинко» ўйин автоматлари залларига ўрнатилади. Бундай ўйин залларининг аксарияти келиб чиқиши шимолий кореялик бўлган шахслар назоратида, деб тахмин қилинади; улар шу йўл билан хорижий валюта ишлайди.

Япония томонидан КХДРга нисбатан бир томонлама жорий этилган санкциялар сабаб, япон компаниялари Шимолий Корея билан савдо операцияларини амалга ошира олмайди. 2016 йил бошида Япония полицияси КХДРга биринчи эҳтиёж молларини экспорт қилганликда айблаб, Токиодаги савдо компанияларидан бирининг раҳбарини ҳибсга олган эди.

Япония ҳукумати Пхеньянга нисбатан санкцияларни сўнгги бор 2017 йил ноябрида кучайтирган эди. Ўшанда санксион рўйхатга 35 юридик ва жисмоний шахс киритилган эди. Кўрилган чоралар амалда КХДР билан савдони, маълум бир тоифа шахслар учун бу мамлакатга сафарларни тақиқлаган, шунингдек, Япониядан Шимолий Кореяга пул ўтказмаларини чеклаган эди.