Turkiya NATOning Norvegiyadagi mashg‘ulotlarida yuz bergan ko‘ngilsiz holatdan so‘ng Shimoliy Atlantika alyansi bilan aloqalarni uzishni rejalashtirmagan. Bu haqda mamlakat prezidentining rasmiy vakili Ibrohim Qalin ma’lum qildi, deya xabar beradi “TASS”.
“Turkiya bu hodisadan so‘ng NATO bilan aloqalarni uzishni rejalashtirmagan. Anqara alyans mashg‘ulotlarida bunday hodisa nima uchun ro‘y bergani va bu holat qaytarilishi mumkinligi yoki yo‘qligini tushunib yetishni istaydi”, — dedi Ibrohim Qalin.
Oldinroq Turkiya prezidentining bosh maslahatchisi Yalchin Topchu Anqara NATO bilan munosabatlarni qayta ko‘rib chiqishi lozimligi, a’zolaridan biriga dushmanlik bilan yondashayotgan tashkilot mamlakat uchun yagona variant emasligini bildirgandi.
Eslatib o‘tamiz, Norvegiyada bo‘lib o‘tgan NATO shtab mashg‘ulotlarida Turkiyaning birinchi prezidenti Mustafo Kamol Otaturk portreti va amaldagi prezident Rajab Toyyib Erdo‘g‘on nomi ehtimoliy dushmanni belgilash uchun foydalanildi. Shundan so‘ng 40 nafar turk harbiy xizmatchisi mashqlardan chaqirib olindi.
Izoh (0)