Туркия НАТОнинг Норвегиядаги машғулотларида юз берган кўнгилсиз ҳолатдан сўнг Шимолий Атлантика альянси билан алоқаларни узишни режалаштирмаган. Бу ҳақда мамлакат президентининг расмий вакили Иброҳим Қалин маълум қилди, дея хабар беради «ТАСС».
«Туркия бу ҳодисадан сўнг НАТО билан алоқаларни узишни режалаштирмаган. Анқара альянс машғулотларида бундай ҳодиса нима учун рўй бергани ва бу ҳолат қайтарилиши мумкинлиги ёки йўқлигини тушуниб етишни истайди», — деди Иброҳим Қалин.
Олдинроқ Туркия президентининг бош маслаҳатчиси Ялчин Топчу Анқара НАТО билан муносабатларни қайта кўриб чиқиши лозимлиги, аъзоларидан бирига душманлик билан ёндашаётган ташкилот мамлакат учун ягона вариант эмаслигини билдирганди.
Эслатиб ўтамиз, Норвегияда бўлиб ўтган НАТО штаб машғулотларида Туркиянинг биринчи президенти Мустафо Камол Отатурк портрети ва амалдаги президент Ражаб Тоййиб Эрдўғон номи эҳтимолий душманни белгилаш учун фойдаланилди. Шундан сўнг 40 нафар турк ҳарбий хизматчиси машқлардан чақириб олинди.
Изоҳ (0)