Milliy matbuot markazida O‘zbekiston Respublikasi Avtomobil yo‘llari davlat qo‘mitasi tomonidan matbuot anjumani o‘tkazildi. Bu haqda O‘zA xabar bermoqda.
Mamlakatning ba’zi hududlaridagi ta’mirtalab yo‘llar aholi va transport harakatiga noqulayliklar tug‘dirmoqda. Bu esa aholi va foydalanuvchilar e’tiroziga sabab bo‘lmoqda.
2017-yil 1-noyabr holatida 3 ming kilometrga yaqin mintaqaviy avtomobil yo‘llari ta’mirlandi. Umumiy foydalanuvda bo‘lgan 155,2 kilometr avtomobil yo‘llari kapital ta’mirlandi, xuddi shu tasnifdagi 2 ming 350 kilometr avtomobil yo‘llarida joriy ta’mir o‘tkazish yo‘li bilan ularning ravonligi ta’minlandi.
Yil oxirigacha O‘zbek milliy avtomagistrali tarkibidagi 260 kilometr avtomobil yo‘llari zamonaviy talab va standartlar asosida rekonstruksiya qilinadi.
Joriy yil G‘uzor—Buxoro—Nukus—Beynov avtomobil yo‘lining 265, Olmaota—Bishkek—Toshkent—Termiz avtomobil yo‘lining 30 hamda Samarqand—Buxoro—Turkmanboshi avtomobil yo‘lining 15 kilometr qismi qayta ta’mirlanib, foydalanishga topshirildi. Bundan tashqari, Amu-Buxoro kanali hamda Zarafshon daryosi ustidan o‘tgan yangi ko‘priklar ishga tushirildi.
Yo‘l xo‘jaliklarining moddiy-texnik bazasini mustahkamlash maqsadida joriy yil 215 turdagi zamonaviy yo‘l-qurilish texnikalari xarid qilindi.
Izoh (0)