Суриянинг Дайр-аз-Зор вилоятидаги Маядин шаҳри ва унинг атрофларига берилган авиазарбалар оқибатида камида 25 киши, жумладан, аёллар ва болалар ҳалок бўлди. Бу ҳақда 3 ноябрь куни БМТ бош котибининг расмий вакили Стефан Дюжаррик журналистларга маълум қилди, деб хабар берди «ТАСС».
Унинг сўзларига кўра, БМТнинг гуманитар агентликлари «Дайр-аз-Зор вилоятида содир бўлаётган тўқнашувлар оқибатидан чуқур хавотирда». «Кеча Маядин ва унинг атрофига берилган авиазарбалар 25 дан ортиқ одамнинг ўлимига ва кўплаб инсонларнинг жароҳат олишига сабаб бўлди. Уларнинг аксарияти аёллар ва болалар», — деди Дюжаррик.
Расмий вакилнинг маълум қилишича, август ойидан бери жанговар ҳаракатлар сабабли Дайр-аз-Зорни 350 мингдан ортиқ аҳоли тарк этган. Ушбу ҳудуддаги гуманитар вазият жиддийлигича қолмоқда. Вилоятга гуманитар ёрдам сўнгги бор 30 октябрда жўнатилган.
БМТ Сурия можароси томонларини «аҳолини ҳимоя қилиш учун барча чораларни кўришга», шунингдек, мамлакатнинг барча муҳтож фуқароларига гуманитар ёрдамларни хавфсиз ва муаммосиз етиб боришида ёрдам кўрсатишга чақирди.
Изоҳ (0)