RM Sotheby’s kimoshdi savdo uyi bir vaqtlar Apple kompaniyasi rahbari Stiv Jobsga tegishli bo‘lgan BMW Z8 rodsterini sotuvga qo‘ydi. 24 462 kilometr yo‘l bosgan avtomobilni kamida 300—400 ming dollarga sotish rejalashtirilmoqda, deya xabar bermoqda “Motor”.
Jobs bu mashinani Oracle bosh direktori Larri Ellisonning tavsiyasiga ko‘ra sotib olgan. Uning fikricha, bu avtomobil, xuddi Apple mahsulotlari kabi, zamonaviy muhandislik va ergonomika timsoli edi.
Sotuvga qo‘yilgan avtomobil 2000-yil 1-aprelida ishlab chiqarilgan va 6-oktabr kuni Stiv Jobsga yetkazib berilgan. Bu rodster Amerika bozori uchun ishlab chiqarilgan 85- va egasiga yetkazib berilgan 67-namuna bo‘lgan. Z8 ga qo‘shib, rodster Palo-Altoda Jobs nomiga rasmiylashtirilganini tasdiqlovchi texnik sozlik haqidagi sertifikat ham beriladi. Mashina 2003-yilda hozirgi egasiga sotilgan.
BMW Z8 rodsteri 1999—2003-yillarda ishlab chiqarilgan. Jami 5 703 dona shunday avtomobil sotilgan. Mashina alyuminiy rama asosida qurilgan. Kuzov panellari ham shu materialdan tayyorlangan. Z8 ni ishlab chiqishda payvandlash va ekstruziyaning innovatsion uslublaridan foydalanilgan.
Rodster M5 sportsedanining hajmi 4,9 litr, quvvati 408 ot kuchiga teng V8 motori bilan ta’minlangan. Bu dvigatel olti bosqichli “mexanika” vositasida yurgizilgan. Avtomobil 4,7 soniya ichida soatiga 100 kilometrlik tezlikka erishgan. Rodsterning eng yuqori tezligi soatiga 250 kilometr bilan cheklab qo‘yilgan edi.b
Izoh (0)