AQShning Klivlend shahrida 10 yoshli bola otasining mashinasini olib qochdi va salkam bir soat politsiya ta’qibidan qochib yurdi. Bu haqda TJournal xabar bermoqda.
Bola uni maktabga olishi kerak bo‘lgan opasini kutib turgan payt avtomobil kalitini o‘g‘irladi va mashinani Ogayo Ternpayk trassasi tomon haydadi. Uning onasi nima yuz berganini anglab yetganidan so‘ng orqasidan boshqa avtomobilda quvib ketdi va keyinchalik politsiyaga murojaat qildi.
Ismi oshkor etilmayotgan bola politsiyadan soatiga salkam 160 kilometr tezlikda qochdi. Politsiya undan to‘xtashni talab qildi, biroq u quloq solmay, harakatni davom ettirdi.
Bola politsiya tomonidan qo‘yilgan tikonli to‘siqdan qochib, mashinani chetga burdi. U yana trassaga qaytishga harakat qilganida politsiyachilar qamalga oldi va ta’qibni to‘xtatdi. Bolani mashinadan chiqarishga harakat qilishganida mushtlasha ketdi. To‘polonchi deyarli 72 kilometr yo‘l bosishga ulgurgandi.
“10 yoshli bola uchun u avtomobilni juda yaxshi boshqaradi. Vaholanki, bo‘yi juda past, 90 santimetr atrofida. U rul ostidan umuman nimanidir ko‘rganiga hayronman”, — deydi leytenant Richard Rider.
Bu bolaning ota-onasi mashinasini birinchi bor olib qochishi emasligi ma’lum bo‘ldi: voqeadan 10 kun avval onasining mashinasini minib ketgan va g‘ildirak dami chiqquncha “sayr” qilgan ekan.
Izoh (0)