АҚШнинг Кливленд шаҳрида 10 ёшли бола отасининг машинасини олиб қочди ва салкам бир соат полиция таъқибидан қочиб юрди. Бу ҳақда TJournal хабар бермоқда.
Бола уни мактабга олиши керак бўлган опасини кутиб турган пайт автомобиль калитини ўғирлади ва машинани Огайо Тернпайк трассаси томон ҳайдади. Унинг онаси нима юз берганини англаб етганидан сўнг орқасидан бошқа автомобилда қувиб кетди ва кейинчалик полицияга мурожаат қилди.
Исми ошкор этилмаётган бола полициядан соатига салкам 160 километр тезликда қочди. Полиция ундан тўхташни талаб қилди, бироқ у қулоқ солмай, ҳаракатни давом эттирди.
Бола полиция томонидан қўйилган тиконли тўсиқдан қочиб, машинани четга бурди. У яна трассага қайтишга ҳаракат қилганида полициячилар қамалга олди ва таъқибни тўхтатди. Болани машинадан чиқаришга ҳаракат қилишганида муштлаша кетди. Тўполончи деярли 72 километр йўл босишга улгурганди.
«10 ёшли бола учун у автомобилни жуда яхши бошқаради. Ваҳоланки, бўйи жуда паст, 90 сантиметр атрофида. У рул остидан умуман ниманидир кўрганига ҳайронман», — дейди лейтенант Ричард Ридер.
Бу боланинг ота-онаси машинасини биринчи бор олиб қочиши эмаслиги маълум бўлди: воқеадан 10 кун аввал онасининг машинасини миниб кетган ва ғилдирак дами чиққунча «сайр» қилган экан.
Изоҳ (0)