30-oktabr, dushanba kuni “Toshkent—Andijon (O‘zbekiston) —O‘sh—Irkeshtom (Qirg‘iziston) — Koshg‘ar (Xitoy)” yo‘nalishi bo‘ylab ilk xalqaro avtoqatnovning ochilish marosimi bo‘lib o‘tdi. Bu haqda UzDaily xabar bermoqda.
Marosimda O‘zbekiston, Xitoy va Qirg‘iziston delegatsiyalari rahbarlari so‘zga chiqdi. Ular ishga tushirilayotgan yo‘lakning tashqi savdo yo‘nalishlari diversifikatsiyasi va Markaziy Osiyoga yuklar yetkazish muddati sezilarli darajada qisqarishi nuqtai nazaridan muhimligini ta’kidladi.
Sinov avtoqatnovida uch davlatdan 9 ta transport vositasi qatnashmoqda. Yo‘nalishning umumiy uzunligi 900 kilometrni tashkil etadi, bundan 260 kilometri Qirg‘iziston (O‘sh—Irkeshtom), 250 kilometri Xitoyning Shinjon-Uyg‘ur avtonom tumani (Irkeshtom—Koshg‘ar) hisobiga to‘g‘ri keladi.
Qulay ob-havo sharoitlari va chegaralarni kesib o‘tishda navbatlar bo‘lmagan taqdirda yo‘nalish (avtokarvon soatiga o‘rtacha 50-60 kilometr tezlikda yo‘l bosishini hisobga olganda) 2 kunda bosib o‘tiladi.
Ma’lumot uchun, Saritosh posyolkasi va Qirg‘izistonning Irkeshtom dovoni orqali o‘tuvchi yo‘l Farg‘ona vodiysidan Xitoyga eng qisqa avtomobil yo‘li hisoblanadi.
Izoh (0)