30 октябрь, душанба куни «Тошкент—Андижон (Ўзбекистон) —Ўш—Иркештом (Қирғизистон) — Kошғар (Хитой)» йўналиши бўйлаб илк халқаро автоқатновнинг очилиш маросими бўлиб ўтди. Бу ҳақда UzDaily хабар бермоқда.
Маросимда Ўзбекистон, Хитой ва Қирғизистон делегациялари раҳбарлари сўзга чиқди. Улар ишга туширилаётган йўлакнинг ташқи савдо йўналишлари диверсификацияси ва Марказий Осиёга юклар етказиш муддати сезиларли даражада қисқариши нуқтаи назаридан муҳимлигини таъкидлади.
Синов автоқатновида уч давлатдан 9 та транспорт воситаси қатнашмоқда. Йўналишнинг умумий узунлиги 900 километрни ташкил этади, бундан 260 километри Қирғизистон (Ўш—Иркештом), 250 километри Хитойнинг Шинжон-Уйғур автоном тумани (Иркештом—Koшғар) ҳисобига тўғри келади.
Қулай об-ҳаво шароитлари ва чегараларни кесиб ўтишда навбатлар бўлмаган тақдирда йўналиш (автокарвон соатига ўртача 50-60 километр тезликда йўл босишини ҳисобга олганда) 2 кунда босиб ўтилади.
Маълумот учун, Саритош посёлкаси ва Қирғизистоннинг Иркештом довони орқали ўтувчи йўл Фарғона водийсидан Хитойга энг қисқа автомобиль йўли ҳисобланади.
Изоҳ (0)