Rossiya elchisi: Moskva Ostonaning lotin alifbosiga o‘tish haqidagi qaroriga hurmat bilan yondashadi

Rossiya Qozog‘istonning davlat tilini lotin alifbosiga o‘tkazish qaroriga tushunish va hurmat bilan yondashadi. Bu haqda ikki davlat parlament a’zolari uchrashuvida Rossiyaning Qozog‘istondagi elchisi Mixail Bocharnikov ma’lum qildi, deya xabar beradi “Kazinform”.

“Qozog‘iston rus tilining rasmiy maqomi konstitutsiya bilan tasdiqlangan davlat. Rossiya suveren Qozog‘istonning davlat tilini lotin alifbosiga o‘tkazish qaroriga tushunish va hurmat bilan yondashadi. Shu bilan birga, prezident Nursulton Nazarboyev va mamlakatning boshqa rasmiylariga ko‘ra, rus tilining mavqeyi, o‘rta maktablarda rus tili saboqlari va unda dars berish saqlanib qoladi. Zero, mamlakat fuqarolarining rus tilining egallaganligi respublika rahbariyati tomonidan Qozog‘istonning muhim madaniy afzalligi sifatida ko‘rilmoqda”, — ta’kidladi Rossiya elchisi.

Eslatib o‘tamiz, oldinroq Qozog‘iston prezidenti Nursulton Nazarboyev qozoq tili alifbosini kirilldan lotin grafikasiga o‘tkazish haqidagi farmonni imzolagandi.