Qirg‘iziston prezidenti saylovlari yakunlarini e’lon qilish nomzodlardan birining sudga da’vosi tufayli qoldirilmoqda

Qirg‘iziston markaziy saylov komissiyasi prezidentlik sayovlarining rasmiy yakunlarini e’lon qilishni davom etayotgan sud jarayoni tufayli qoldirishga majbur bo‘lmoqda. Bu haqda “TASS” xabar berdi.

“Saylovlar natijasini rasman ma’lum qilish nomzod Toktayim Umetaliyeva bilan bog‘liq sud muhokamasi tufayli qoldirilmoqda. U ovoz berishdan so‘ng Bishkekdagi salkam 30 ta saylov uchastkasidagi natijalarni haqiqiy emas deb topish to‘g‘risida sudga da’vo kiritdi. Birinchi instansiya sudi uning talabini qondirishni rad etdi, 30-oktabr, dushanba kuni ish Oliy sudda ko‘riladi. Bu saylovlar bilan bog‘liq oxirgi sud jarayoni, u yakunlanganidan so‘ng ovoz berish natijalari rasman e’lon qilinishi kerak”, — ta’kidladi markaziy saylov komissiyasi vakillari.

Bu 30-oktabr kechki payt yoki 31-oktabr ertalab amalga oshishi kutilmoqda. Qirg‘iz qonunchiligiga ko‘ra, mamlakatning yangi prezidenti inauguratsiya marosimi ovoz berish natijalari rasman e’lon qilinganidan so‘ng bir oy ichida bo‘lib o‘tishi lozim. Saylov yakunlari esa ular o‘tkazilganidan 20 kundan so‘ng ma’lum qilinishi kerak.