AQSh prezidenti Donald Tramp Jon Kennedi o‘ldirilishi bo‘yicha qator hujjatlarni oshkor etish haqidagi memorandumni imzoladi. Bu haqda “RIA Novosti” xabar bermoqda.
Davlat rahbari ayrim materiallarni oshkor etmaslik haqidagi qarorini xavfsizlik zarurati bilan izohladi.
“AQSh jamoatchiligi hukumat prezident Jon Kennedi o‘limi bo‘yicha hujjatlar bilan tanishish imkonini yaratib berishini kutmoqda. Ular bu muhim voqeaning barcha tafsilotlarini bilishga haqli. Shu sababli hujjatlardan maxfiylik tamg‘asini olishga ko‘rsatma berdim”, — deyiladi Tramp vazirliklarga yo‘llagan memorandumda.
Milliy arxivlar saytida jami 2891 ta hujjat joylashtirildi. Bu materiallarning navbatdagi turkumi bo‘lib, oldingisi 24-iyulda chop etilgan va 3,9 ming hujjatdan iborat edi. Yana bir necha ming hujjat 2018-yil apreli oxiriga qadar e’lon qilinadi.
Tadqiqotchilarga ko‘ra, hujjatlar Kennedining qotili Li Xarvi Osvaldning prezidentga suiqasddan bir necha hafta oldin Mexikoga 6 kunlik safariga tegishli bo‘lishi mumkin. Meksika poytaxtida Osvald Kuba va SSSR agentlari bilan uchrashgan hamda MRBning mahalliy rezidenturasi e’tiboriga tushgandi.
Izoh (0)