O‘zbekiston bugungi kunda aholini, xususan, qish mavsumida o‘z kartoshkasi bilan ta’minlashda jiddiy muammolarga duch kelmoqda. Bunga 1News e’tibor qaratdi.
Mahsulotning katta qismi qo‘shni davlatlar, shuningdek, Rossiya va Pokistondan keltiriladi. Shu sababli Yangi Yilga kelib kartoshkaning Toshkent shahri bozorlaridagi narxi deyarli ikki barobar ko‘tariladi.
Bu yo‘nalishdagi vaziyat qachon o‘zgaradi? Ushbu savol Xalqaro press-klubning parlamentning yuqori va quyi palatalari vakillari, adliya vaziri o‘rinbosari, Davyergeokadastr raisi o‘rinbosari, fermer xo‘jaliklari kengashi raisi ishtirok etgan navbatdagi sessiyasida yangradi, biroq bu ekspertlar mamlakat qachon ichki bozorni o‘z kartoshkasi bilan ta’minlashi mumkinligi haqidagi savolga aniq javob berolmadi.
Fermer, dehqon xo‘jaliklari va tomorqa yerlari egalari kengashi raisi Bahodir Yusupovga ko‘ra, shunday muammo mavjud va hozirda fermer xo‘jaliklari ilmiy-tadqiqot institutlari va yosh olimlar bilan hamkorlikda uning yechimi ustida ishlamoqda. Rossiya qishloq xo‘jaligi vaziri Aleksandr Tkachyovning O‘zbekistonga tashrifidan so‘ng barcha manfaatdor tomonlar kartoshkachilik sohasidagi ishlarni yanada faollashtirdi.
Tkachyovning tashrifidan keyin Rossiya kartoshka uyushmasi, “O‘zbekoziqovqatxolding” va Qirg‘iziston sanoatchilar va tadbirkorlar uyushmasi o‘rtasida hamkorlik to‘g‘risida uch tomonlama kelishuv, shuningdek, Rossiya kartoshka uyushmasi va O‘zbekistonning Sanray Agro Plus korxonasi o‘rtasida mamlakat hududida urug‘li kartoshka yetishtirish bo‘yicha seleksiya-urug‘chilik markazini tashkil etish yuzasidan kelishuv imzolandi.
“Shunday yer, ob-havo, suvga ega bo‘la turib kartoshkani import qilish O‘zbekiston uchun kechirilmas holat. Biz bu bilan izchil va maqsadli shug‘ullanmiz”, — ta’kidladi Bahodir Yusupov. Biroq erishiladigan aniq ko‘rsatkichlar va maqsadli parametrlarni keltirib o‘tmadi.
Izoh (0)