Ўзбекистонда аҳолини ўз картошкаси билан таъминлашдаги вазият қачон ўзгаради?

Ўзбекистон бугунги кунда аҳолини, хусусан, қиш мавсумида ўз картошкаси билан таъминлашда жиддий муаммоларга дуч келмоқда. Бунга 1News эътибор қаратди.

Маҳсулотнинг катта қисми қўшни давлатлар, шунингдек, Россия ва Покистондан келтирилади. Шу сабабли Янги Йилга келиб картошканинг Тошкент шаҳри бозорларидаги нархи деярли икки баробар кўтарилади.

Бу йўналишдаги вазият қачон ўзгаради? Ушбу савол Халқаро пресс-клубнинг парламентнинг юқори ва қуйи палаталари вакиллари, адлия вазири ўринбосари, Давергеокадастр раиси ўринбосари, фермер хўжаликлари кенгаши раиси иштирок этган навбатдаги сессиясида янгради, бироқ бу экспертлар мамлакат қачон ички бозорни ўз картошкаси билан таъминлаши мумкинлиги ҳақидаги саволга аниқ жавоб беролмади.

Фермер, деҳқон хўжаликлари ва томорқа ерлари эгалари кенгаши раиси Баҳодир Юсуповга кўра, шундай муаммо мавжуд ва ҳозирда фермер хўжаликлари илмий-тадқиқот институтлари ва ёш олимлар билан ҳамкорликда унинг ечими устида ишламоқда. Россия қишлоқ хўжалиги вазири Александр Ткачёвнинг Ўзбекистонга ташрифидан сўнг барча манфаатдор томонлар картошкачилик соҳасидаги ишларни янада фаоллаштирди.

Ткачёвнинг ташрифидан кейин Россия картошка уюшмаси, «Ўзбекозиқовқатхолдинг» ва Қирғизистон саноатчилар ва тадбиркорлар уюшмаси ўртасида ҳамкорлик тўғрисида уч томонлама келишув, шунингдек, Россия картошка уюшмаси ва Ўзбекистоннинг Sanray Agro Plus корхонаси ўртасида мамлакат ҳудудида уруғли картошка етиштириш бўйича селекция-уруғчилик марказини ташкил этиш юзасидан келишув имзоланди.

«Шундай ер, об-ҳаво, сувга эга бўла туриб картошкани импорт қилиш Ўзбекистон учун кечирилмас ҳолат. Биз бу билан изчил ва мақсадли шуғулланмиз», — таъкидлади Баҳодир Юсупов. Бироқ эришиладиган аниқ кўрсаткичлар ва мақсадли параметрларни келтириб ўтмади.