Qoraqalpog‘iston Respublikasi paxtakorlari 2017-yilgi paxta topshirish bo‘yicha shartnoma rejasini bajardi. Respublikada 2017-yil hosilidan paxta xomashyosi tayyorlash bo‘yicha 20-oktabr holatiga bo‘lgan tezkor ma’lumot surati “Kun.uz” tomonidan e’lon qilindi.
2017-yil rejasiga ko‘ra, qoraqalpog‘istonlik paxtakorlar 186 200 tonna paxta xomashyosini tayyorlashi ko‘zda tutilgan edi. 20-oktabr holatiga ko‘ra, hududdagi fermer xo‘jaliklari rejani 100,15 foizga bajarib, 186 477 tonnalik xirmon ko‘tardi.
Joriy terim mavsumida paxta xomashyosini topshirish bo‘yicha davlat rejasini birinchi bo‘lib Xorazm viloyati bajargan edi. Buning uchun Prezident Shavkat Mirziyoyev viloyat paxtakorlarini “ikki karra qahramon” deb atadi.
20-oktabr holatiga ko‘ra, paxta rejasini Navoiy viloyati qariyb 95 foizga, Buxoro viloyati deyarli 93 foizga, Qashqadaryo viloyati 91 foizga bajarib bo‘lgan. Qo‘lda terilgan paxtaning har kilogrammi uchun O‘zbekiston bo‘yicha eng ko‘p haq olayotgan Jizzax, Sirdaryo va Toshkentdagi paxtakorlar rejani 66—69 foizga bajarib bo‘lgan.
Ma’lumotlarga ko‘ra, joriy yilda O‘zbekiston bo‘yicha 3 180 700 tonnalik paxta xirmoni ko‘tarilishi ko‘zda tutilgan bo‘lib, hozirgacha 2 651 203 tonna paxta terib bo‘lingan — reja 83,35 foizga bajarilgan.
Izoh (0)