Қорақалпоғистон Республикаси пахтакорлари 2017 йилги пахта топшириш бўйича шартнома режасини бажарди. Республикада 2017 йил ҳосилидан пахта хом ашёси тайёрлаш бўйича 20 октябрь ҳолатига бўлган тезкор маълумот сурати «Kun.uz» томонидан эълон қилинди.
2017 йил режасига кўра, қорақалпоғистонлик пахтакорлар 186 200 тонна пахта хом ашёсини тайёрлаши кўзда тутилган эди. 20 октябрь ҳолатига кўра, ҳудуддаги фермер хўжаликлари режани 100,15 фоизга бажариб, 186 477 тонналик хирмон кўтарди.
Жорий терим мавсумида пахта хом ашёсини топшириш бўйича давлат режасини биринчи бўлиб Хоразм вилояти бажарган эди. Бунинг учун Президент Шавкат Мирзиёев вилоят пахтакорларини «икки карра қаҳрамон» деб атади.
20 октябрь ҳолатига кўра, пахта режасини Навоий вилояти қарийб 95 фоизга, Бухоро вилояти деярли 93 фоизга, Қашқадарё вилояти 91 фоизга бажариб бўлган. Қўлда терилган пахтанинг ҳар килограмми учун Ўзбекистон бўйича энг кўп ҳақ олаётган Жиззах, Сирдарё ва Тошкентдаги пахтакорлар режани 66—69 фоизга бажариб бўлган.
Маълумотларга кўра, жорий йилда Ўзбекистон бўйича 3 180 700 тонналик пахта хирмони кўтарилиши кўзда тутилган бўлиб, ҳозиргача 2 651 203 тонна пахта териб бўлинган — режа 83,35 фоизга бажарилган.
Изоҳ (0)