“Oltin to‘p” uchun nomzodlar 30 taligiga kirgan Leo Messi katta qiyinchilik bilan bo‘lsa-da, Argentina termasini Jahon Chempionatiga olib chiqdi.
Ha, aynan Messi bu ishni uddaladi. Boshi berk ko‘chaga kirib qolgan argentinaliklar, yetmaganiga hal qiluvchi o‘yin boshidayoq gol o‘tkazib yuborishdi. Ammo to‘rt yillikning asosiy musobaqasini faqatgina televizorda tomosha qilish Leoga to‘g‘ri kelmasdi.
Messini futbol tarixida eng yaxshisi deb hisoblaydiganlar talaygina. Va bu fikrga qo‘shilmaydiganlar ham yo‘q emas. Masalan, FIFA prezidenti Janni Infantino kabi gumondorlar Messiga terma jamoasi bilan qo‘lga kiritilgan unvon yetishmasligini aytib o‘tadi. La Liganing qandaydir o‘yinida Leo gol ura olmasa, ular bu fikrida yanada sobitroq tura boshlaydi.
Mana endi savol tug‘iladi. Messida “Oltin to‘p”larning 5 tasi bor, biroq u mundialda zafar qucha olmagan. Demak, Maradona yoki Pele bilan raqobatlasha olmaydi, shundaymi? “Championat.asia” nashri futbol afsonalarining bu boradagi fikrlarini jamlab chiqdi.
Messi — ajoyib o‘yinchi. U endi Jahon Chempionatida g‘alaba qozonishi kerak. Chunki tarix mundialni yutmagan buyuk futbolchilarni unutmaydi. Aynan shu sovrin sabab Maradona noyob futbolchi bo‘la olgandi. U ham klubda, ham termada asosiy rolda o‘ynab, jamoasiga bir qancha sovrinlar olib kelgani bilan ajralib turadi.Janni Infantino, FIFA prezidenti
Argentina terma jamoasi safida 1978-yil jahon chempionligini qo‘lga kiritgan Mario Kempes ancha neytral fikr bildirdi.
Rossiya mundialida Argentina va Messining ishtirok etmasligi dahshatli voqea bo‘lardi. Bundan faqatgina Maradona muxlislarining boshi osmonga yetadi. Ular faqatgina shu sabab bilan Diyegoni futbol tarixidagi eng yaxshisi deb hisoblaydi.Mario Kempes, Argentina termasi sobiq futbolchisi
Diyego Simeone Maradona va Messi o‘rtasidagi davrda Argentina sharafini himoya qilgan futbolchi. U ayni damda “Barselona”ning raqobatchilaridan biri bo‘lgan “Atletiko”ni boshqaradi. Balki, fikrlari ko‘pchilik uchun ahamiyatli bo‘lishi mumkin edi.
Men Messini Maradona bilan hech qachon solishtirmayman, bu noto‘g‘ri. Ularning o‘ziga xos bo‘lgan va bir-biriga o‘xshamaydigan juda ko‘plab fazilatlari bor.Diyego Simeone, “Atletiko” bosh murabbiyi
Argentina termasining ashaddiy raqibi Braziliya safidagi o‘yinlari orqali mashhur bo‘lgan Romario nafaqat Messi, balki Maradonadan-da o‘zining kuchliroq ekani haqidagi mavzuga o‘tib ketdi.
Messi xuddi Ronaldu va Neymar kabi zamonaviy futbolning eng kuchli namoyondasi. Ha, u besh bor “Oltin to‘p”ni qo‘lga kiritdi. Lekin menga nima?! Men 1000 ta gol urganman va Jahon Chempionatida zafar quchganman. Messi yoki Ronaldu shunga erisha oladimi?Maradona ularni ortda qoldiradi. Diyego Argentina termasi uchun Messidan ko‘proq narsa bergan. Ularga hurmatni saqlaganim holda aytishim kerakki, men ularning har uchalasidan ham kuchliroq bo‘lganman.
Romario, Braziliya termasi sobiq futbolchisi
Jangovor ruhdagi filmlari bilan muxlislar qalbidan joy olgan Arnold Shvarsenegger Messiga bo‘lgan simpatiyasini yashira olmadi.
Kimnidir boshqasi bilan taqqoslash niyatim yo‘q. Biroq aytishim kerakki, Messi — futbol terminatori! Biz uni shunday atashga haqlimiz!Arnold Shvarsenegger, kinoaktyor
Braziliya termasi yulduzi Romario o‘z fikrini bildirganda, kolumbiyalik Karlos Valderamma bir chetda qarab tura olmasdi.
Messi yoki Maradona? Axir, bu yerda solishtiradigan narsaning o‘zi yo‘q! Diyego, albatta, eng zo‘r futbolchi! Messi ham yaxshi, lekin u Maradona bo‘lolmaydi, ularni solishtirish adolatdan emas. Messining o‘rnida kim bo‘lishidan qat’iy nazar, Diyego darajasiga yeta olmasdi.Karlos Valderrama, Kolumbiya termasining sobiq futbolchisi
Jahonga mashhur futbolchilarni u klubdan bu klubga sotish orqali boyigan futbol agenti Mino Rayola Messi bilan hamkorlik qilmaydi. Tabiiyki, Messi buni istamaydi. Katta ehtimol bilan Rayola u bilan hamkorlik qilish uchun uchib kelgan bo‘lardi. Balki shungadir, Rayolaning fikrlarida simpatiya Diyegoga qarab ketadi.
Messi ajoyib o‘yinchi bo‘lishiga qaramay, terma jamoa va boshqa chempionatlarda sovrin yutmasdan turib buyuk bo‘la olmaydi.Mino Rayola, futbol agenti
Rayolaning fikrida qisman jon bordek. Messi chindan ham La Ligadan boshqa chempionatda, “Barselona”dan o‘zga klubda omadini sinab ko‘rmagan. Xo‘sh, uning hayotida muhim rol o‘yragan Xosep Gvardiola qanday fikrda?
Men ko‘rgan futbolchilar ichida Messi eng yaxshisi. Chunki u hamma narsani oson bajara oladi. Eng buyuk deb 3—4 raqibini aldab o‘tganni emas, balki qarshisidagi istalgan futbolchini aldab o‘ta olganni aytish mumkin. Leo bu borada hech ham adashmaydi.Xosep Gvardiola, “Manchester Siti” bosh murabbiyi
Maradonaning navqiron yillari “Napoli” safida o‘tgandi.
Messi Argentinadek kuchli tarkibga ega jamoada o‘ynasa-da, yutuqlarga erishishda qiynalmoqda. Maradona davrida tarkib bu qadar to‘kis emasdi. Shunday bo‘lishiga qaramay, u Jahon Chempionatini yutdi. Demak, Diyego — eng zo‘ri!Korrado Ferlaino, “Napoli” sobiq prezidenti
Armando Maradona davrining yorqin namoyondalaridan biri, gollandiya futbolining tirik afsonasi faqatgina subyektiv fikrlarga tayanmadi, balki sabablarni ochiqlashga urindi.
Maradona nafaqat buyuk futbolchi, balki haqiqiy rahbar ham bo‘lgan. U JCh—1986 da qanday g‘alaba qozonish mumkinligini yaxshi bilgan. Messining ham o‘ziga xos xususiyatlari bor, biroq u vaqt, hakam va OAV bilan himoyalangan. Diyego esa raqiblari uning oyoqlarini osongina sindirishi mumkinligini yodda tutgani holda muvaffaqiyatga erishgan.Ruud Gullit, Gollandiya termasining sobiq futbolchisi
Gollandiyalik mutaxassisdan keyin italiyalik Fabio Kapello ham o‘z fikri bilan o‘rtoqlashdi.
Pele, Maradona va Messi futbol tarixidagi eng yaxshi uch o‘yinchi. Odamlar ularning o‘yinini tik turib olqishlagan holda tomosha qiladi.Fabio Kapello, italiyalik mutaxassis
Ham “Real” safida to‘p tepgan, ham Argentina termasi sharafini himoya qilgan sobiq futbolchining fikri shunday:
Messi Maradona darajasidagi futbolchi, ular teng. Biz argentinaliklar shunday ikki buyuk futbolchi vatandoshlarimiz ekanidan faxrlanishimiz kerak.Fernando Redondo, argentinalik sobiq futbolchi
Yaqin-yaqingacha A seriyada qator gollar uradigan Antonio Kassano o‘z zamondoshini ustunroq hisobladi.
Hozirgi futbol Maradona davridagidan boshqa. U biroz qiyinlashgan, unda alohida jismoniy tayyorgarlik talab etiladi, raqobat kuchli. Messi mana shunday paytda 5 ta “Oltin to‘p” oldi. Shu sababli u hammadan ustun.Antonio Kassano, Italiya termasining sobiq futbolchisi
Braziliya termasining sobiq hujumchisi Ronaldo o‘zidan kichik bo‘lgan Messiga emas, kattaroq bo‘lgan afsonalarga hurmat bajo keltirdi.
Messi — o‘zga sayyoralik. Ammo Pele va Maradona o‘zlaridan keyingilardan ancha ustun.Ronaldo, Braziliya termasi sobiq futbolchisi
Sizningcha, Xaviga kim ko‘proq yoqishi mumkin?
Pele va Maradona futbol rivojiga ulkan hissa qo‘shdi. Ammo Messi baribir eng zo‘r.Xavi, Ispaniya termasining sobiq futbolchisi
“Futbol qiroli” Pele Argentinaning eng yaxshi o‘yinchisi deb na Messini va na Maradonani biladi.
Messi 15 yillik shahzodasi, ammo qirol emas. Chunki ota-onam “fabrika”ni allaqachon yopgan. Demak, qirol bitta! Argentinaliklardan Messi yo Maradonani eng zo‘ri demayman. Ulardan ham zo‘ri bor — Di Stefano.Pele, “Futbol qiroli”
Bahs-munozaraga Maradonaning o‘zi yakun yasaydi.
Men futbolda ajoyib faoliyat olib bordim, maydonda zavqlanishga harakat qildim. Endi buni mening o‘rnimga Messi amalga oshirsin. Ikkimiz o‘rtamizda hech qanday taqqoslash bo‘lishi mumkin emas.Diyego Armando Maradona
Izoh (0)