«Олтин тўп» учун номзодлар 30 талигига кирган Лео Месси катта қийинчилик билан бўлса-да, Аргентина термасини Жаҳон Чемпионатига олиб чиқди.
Ҳа, айнан Месси бу ишни уддалади. Боши берк кўчага кириб қолган аргентиналиклар, етмаганига ҳал қилувчи ўйин бошидаёқ гол ўтказиб юборишди. Аммо тўрт йилликнинг асосий мусобақасини фақатгина телевизорда томоша қилиш Леога тўғри келмасди.
Мессини футбол тарихида энг яхшиси деб ҳисоблайдиганлар талайгина. Ва бу фикрга қўшилмайдиганлар ҳам йўқ эмас. Масалан, ФИФА президенти Жанни Инфантино каби гумондорлар Мессига терма жамоаси билан қўлга киритилган унвон етишмаслигини айтиб ўтади. Ла Лиганинг қандайдир ўйинида Лео гол ура олмаса, улар бу фикрида янада собитроқ тура бошлайди.
Мана энди савол туғилади. Мессида «Олтин тўп»ларнинг 5 таси бор, бироқ у мундиалда зафар қуча олмаган. Демак, Марадона ёки Пеле билан рақобатлаша олмайди, шундайми? «Championat.asia» нашри футбол афсоналарининг бу борадаги фикрларини жамлаб чиқди.
Месси — ажойиб ўйинчи. У энди Жаҳон Чемпионатида ғалаба қозониши керак. Чунки тарих мундиални ютмаган буюк футболчиларни унутмайди. Айнан шу соврин сабаб Марадона ноёб футболчи бўла олганди. У ҳам клубда, ҳам термада асосий ролда ўйнаб, жамоасига бир қанча совринлар олиб келгани билан ажралиб туради.Жанни Инфантино, ФИФА президенти
Аргентина терма жамоаси сафида 1978 йил жаҳон чемпионлигини қўлга киритган Марио Кемпес анча нейтрал фикр билдирди.
Россия мундиалида Аргентина ва Мессининг иштирок этмаслиги даҳшатли воқеа бўларди. Бундан фақатгина Марадона мухлисларининг боши осмонга етади. Улар фақатгина шу сабаб билан Диегони футбол тарихидаги энг яхшиси деб ҳисоблайди.Марио Кемпес, Аргентина термаси собиқ футболчиси
Диего Симеоне Марадона ва Месси ўртасидаги даврда Аргентина шарафини ҳимоя қилган футболчи. У айни дамда «Барселона»нинг рақобатчиларидан бири бўлган «Атлетико»ни бошқаради. Балки, фикрлари кўпчилик учун аҳамиятли бўлиши мумкин эди.
Мен Мессини Марадона билан ҳеч қачон солиштирмайман, бу нотўғри. Уларнинг ўзига хос бўлган ва бир-бирига ўхшамайдиган жуда кўплаб фазилатлари бор.Диего Симеоне, «Атлетико» бош мураббийи
Аргентина термасининг ашаддий рақиби Бразилия сафидаги ўйинлари орқали машҳур бўлган Ромарио нафақат Месси, балки Марадонадан-да ўзининг кучлироқ экани ҳақидаги мавзуга ўтиб кетди.
Месси худди Роналду ва Неймар каби замонавий футболнинг энг кучли намоёндаси. Ҳа, у беш бор «Олтин тўп»ни қўлга киритди. Лекин менга нима?! Мен 1000 та гол урганман ва Жаҳон Чемпионатида зафар қучганман. Месси ёки Роналду шунга эриша оладими?Марадона уларни ортда қолдиради. Диего Аргентина термаси учун Мессидан кўпроқ нарса берган. Уларга ҳурматни сақлаганим ҳолда айтишим керакки, мен уларнинг ҳар учаласидан ҳам кучлироқ бўлганман.
Ромарио, Бразилия термаси собиқ футболчиси
Жанговор руҳдаги фильмлари билан мухлислар қалбидан жой олган Арнольд Шварценеггер Мессига бўлган симпатиясини яшира олмади.
Кимнидир бошқаси билан таққослаш ниятим йўқ. Бироқ айтишим керакки, Месси — футбол терминатори! Биз уни шундай аташга ҳақлимиз!Арнольд Шварценеггер, киноактёр
Бразилия термаси юлдузи Ромарио ўз фикрини билдирганда, колумбиялик Карлос Вальдерамма бир четда қараб тура олмасди.
Месси ёки Марадона? Ахир, бу ерда солиштирадиган нарсанинг ўзи йўқ! Диего, албатта, энг зўр футболчи! Месси ҳам яхши, лекин у Марадона бўлолмайди, уларни солиштириш адолатдан эмас. Мессининг ўрнида ким бўлишидан қатъий назар, Диего даражасига ета олмасди.Карлос Вальдеррама, Колумбия термасининг собиқ футболчиси
Жаҳонга машҳур футболчиларни у клубдан бу клубга сотиш орқали бойиган футбол агенти Мино Райола Месси билан ҳамкорлик қилмайди. Табиийки, Месси буни истамайди. Катта эҳтимол билан Райола у билан ҳамкорлик қилиш учун учиб келган бўларди. Балки шунгадир, Раёланинг фикрларида симпатия Диегога қараб кетади.
Месси ажойиб ўйинчи бўлишига қарамай, терма жамоа ва бошқа чемпионатларда соврин ютмасдан туриб буюк бўла олмайди.Мино Райола, футбол агенти
Райоланинг фикрида қисман жон бордек. Месси чиндан ҳам Ла Лигадан бошқа чемпионатда, «Барселона»дан ўзга клубда омадини синаб кўрмаган. Хўш, унинг ҳаётида муҳим рол ўйраган Хосеп Гвардиола қандай фикрда?
Мен кўрган футболчилар ичида Месси энг яхшиси. Чунки у ҳамма нарсани осон бажара олади. Энг буюк деб 3—4 рақибини алдаб ўтганни эмас, балки қаршисидаги исталган футболчини алдаб ўта олганни айтиш мумкин. Лео бу борада ҳеч ҳам адашмайди.Хосеп Гвардиола, «Манчестер Сити» бош мураббийи
Марадонанинг навқирон йиллари «Наполи» сафида ўтганди.
Месси Аргентинадек кучли таркибга эга жамоада ўйнаса-да, ютуқларга эришишда қийналмоқда. Марадона даврида таркиб бу қадар тўкис эмасди. Шундай бўлишига қарамай, у Жаҳон Чемпионатини ютди. Демак, Диего — энг зўри!Коррадо Ферлаино, «Наполи» собиқ президенти
Армандо Марадона даврининг ёрқин намоёндаларидан бири, голландия футболининг тирик афсонаси фақатгина субъектив фикрларга таянмади, балки сабабларни очиқлашга уринди.
Марадона нафақат буюк футболчи, балки ҳақиқий раҳбар ҳам бўлган. У ЖЧ—1986 да қандай ғалаба қозониш мумкинлигини яхши билган. Мессининг ҳам ўзига хос хусусиятлари бор, бироқ у вақт, ҳакам ва ОАВ билан ҳимояланган. Диего эса рақиблари унинг оёқларини осонгина синдириши мумкинлигини ёдда тутгани ҳолда муваффақиятга эришган.Рууд Гуллит, Голландия термасининг собиқ футболчиси
Голландиялик мутахассисдан кейин италиялик Фабио Капелло ҳам ўз фикри билан ўртоқлашди.
Пеле, Марадона ва Месси футбол тарихидаги энг яхши уч ўйинчи. Одамлар уларнинг ўйинини тик туриб олқишлаган ҳолда томоша қилади.Фабио Капелло, италиялик мутахассис
Ҳам «Реал» сафида тўп тепган, ҳам Аргентина термаси шарафини ҳимоя қилган собиқ футболчининг фикри шундай:
Месси Марадона даражасидаги футболчи, улар тенг. Биз аргентиналиклар шундай икки буюк футболчи ватандошларимиз эканидан фахрланишимиз керак.Фернандо Редондо, аргентиналик собиқ футболчи
Яқин-яқингача А серияда қатор голлар урадиган Антонио Кассано ўз замондошини устунроқ ҳисоблади.
Ҳозирги футбол Марадона давридагидан бошқа. У бироз қийинлашган, унда алоҳида жисмоний тайёргарлик талаб этилади, рақобат кучли. Месси мана шундай пайтда 5 та «Олтин тўп» олди. Шу сабабли у ҳаммадан устун.Антонио Кассано, Италия термасининг собиқ футболчиси
Бразилия термасининг собиқ ҳужумчиси Роналдо ўзидан кичик бўлган Мессига эмас, каттароқ бўлган афсоналарга ҳурмат бажо келтирди.
Месси — ўзга сайёралик. Аммо Пеле ва Марадона ўзларидан кейингилардан анча устун.Роналдо, Бразилия термаси собиқ футболчиси
Сизнингча, Хавига ким кўпроқ ёқиши мумкин?
Пеле ва Марадона футбол ривожига улкан ҳисса қўшди. Аммо Месси барибир энг зўр.Хави, Испания термасининг собиқ футболчиси
«Футбол қироли» Пеле Аргентинанинг энг яхши ўйинчиси деб на Мессини ва на Марадонани билади.
Месси 15 йиллик шаҳзодаси, аммо қирол эмас. Чунки ота-онам «фабрика»ни аллақачон ёпган. Демак, қирол битта! Аргентиналиклардан Месси ё Марадонани энг зўри демайман. Улардан ҳам зўри бор — Ди Стефано.Пеле, «Футбол қироли»
Баҳс-мунозарага Марадонанинг ўзи якун ясайди.
Мен футболда ажойиб фаолият олиб бордим, майдонда завқланишга ҳаракат қилдим. Энди буни менинг ўрнимга Месси амалга оширсин. Иккимиз ўртамизда ҳеч қандай таққослаш бўлиши мумкин эмас.Диего Армандо Марадона
Изоҳ (0)