30-sentabr kuni futbol bo‘yicha Fransiya chempionatining 8-turidan olgan “Amyen” — “Lill” uchrashuvi vaqtida bir guruh muxlislar stadion tribunasidan quladi. Darvoza ortidagi sektorni ajratib turgan panjara ishqibozlar bosimiga dosh bera olmadi, deya xabar bermoqda TJournal.
Ishqibozlar uchrashuvning 16-daqiqasida, “Lill” futbolchisining golini nishonlash vaqtida tribunadan qulagan. Yerga jami 100 kishi tushib ketgan. Le Figaro ma’lumotlariga ko‘ra, ulardan kamida 29 nafari jabrlangan. Jiddiy jarohat olgan to‘rt kishi kasalxonaga yuborilgan.
Terribles images de l'effondrement d'un grillage à Amiens après le but lillois 😧. 3 blessés graves. #ASCLOSC #Ligue1 pic.twitter.com/fQoRT1S05L
— Jean-Xavier Franco (@jxfranco) September 30, 2017
Mazkur hodisadan so‘ng, uchrashuv to‘xtatilgan. Stadion rahbariyati yaqinda tribunalar holati tekshiruvdan o‘tkazilgani, o‘shanda biror buzilish yoki nosozlik aniqlanmaganini qayd etib o‘tdi.
BBC News’ning qayd etishicha, “Amyen” va “Lill” o‘rtasidagi uchrashuv derbi maqomiga ega (ikki shahar orasidagi masofa atigi 98 kilometr) bo‘lgani uchun ham muxlislar junbushga kelgan va tribunadan tushib ketgan.
“Amyen” so‘nggi 116-yildan beri birinchi marta Fransiya 1-divizionida qatnashmoqda. Jamoa uy uchrashuvlarini 12 ming muxlisga mo‘ljallangan stadionda o‘tkazadi — bu Fransiya chempionatidagi barcha 20 klub orasida eng kichik ko‘rsatkich.
L’Equipe ma’lumotlariga ko‘ra, “Amyen” prezidenti yuz bergan voqeada “Lill” muxlislarini ayblagan. Uning aytishicha, politsiya stadionga noqonuniy yo‘l bilan kirgan 200 tajovuzkor kayfiyatdagi muxlis haqida oldindan ogohlantirgan. “To‘siqlar a’lo darajada edi, fanatlar soni esa yakunda 500 dan oshib ketgan”, — dedi “Amyen” prezidenti.
“Lill”ning ijrochi direktori “Amyen”dagi hamkasbiga javob berib, uning bayonotini mas’uliyatsiz va ig‘vogarona deb atadi. Uning qayd etishicha, aybdorlarni aniqlash bilan Fransiya Professional futbol ligasi shug‘ullanadi.
Izoh (0)