Avval xabar qilinganidek, Urganch shahrida xalq deputatlari Xorazm viloyati kengashining navbatdan tashqari sessiyasi bo‘lib o‘tdi. Unda O‘zbekiston Respublikasi Prezidenti Shavkat Mirziyoyev nutq so‘zladi, deya xabar beradi O‘zA.
Davlat rahbariga ko‘ra, 2018—2019-yillarda Xorazm viloyatida umumiy qiymati 716 million dollar bo‘lgan 1,5 mingga yaqin loyihani amalga oshirish va 16 mingta yangi ish o‘rni yaratishga mo‘ljallangan dastur loyihasi ishlab chiqildi. Shundan qiymati 450 million dollar bo‘lgan 478 ta loyiha tashabbuskorlarning o‘z mablag‘lari va to‘g‘ridan-to‘g‘ri xorijiy investitsiyalar hisobidan amalga oshiriladi. Joriy yilda Qishloq xo‘jaligi korxonalarini tarkibiy qayta tuzish agentligi tomonidan qiymati 6,7 million dollarlik 12 ta loyiha amalga oshirilmoqda.
Ayni vaqtda xalqaro moliya institutlarining mablag‘larini jalb etish hisobidan amalga oshiriladigan yirik loyihalar soni viloyatdagi mavjud salohiyatga nisbatan juda kam. Shu sababli Xorazm va Qoraqalpog‘iston Respublikasi uchun qishloq xo‘jalik mahsulotlarini yetishtirish va qayta ishlash bo‘yicha kamida 100 million dollarlik maxsus xorijiy kreditlarni jalb etish topshirildi.
Shavkat Mirziyoyev bu boradagi ishlarni yanada rivojlantirish va yangi bosqichga ko‘tarish maqsadida 2018-yilni Xorazm viloyati uchun “Tadbirkorlikni tubdan rivojlantirish va investitsiyalar yili” deb e’lon qilishni taklif etdi.
Loyiha boshqaruvi milliy agentligiga Iqtisodiyot vazirligi, Tashqi savdo vazirligi va Investitsiyalar bo‘yicha davlat qo‘mitasi bilan birgalikda 10 kun muddatda Xorazm viloyatida tadbirkorlik va investitsiyalarni jalb etish borasidagi ishlarni tubdan takomillashtirish bo‘yicha Prezident qarori loyihasini tayyorlab, tasdiqlash uchun kiritish topshirildi.
Mazkur vazirlik va idoralar rahbarlari viloyat va tumanlar hokimlarining iqtisodiyot bo‘yicha o‘rinbosarlari bilan birga, chet mamlakatlardagi elchilarni jalb etgan holda, bir yilda 15-20 million dollar miqdorida investitsiyalar olib kelish uchun shaxsan mas’ul etib belgilandi.
“Viloyat va tuman hokimlarining iqtisodiyot bo‘yicha o‘rinbosarlari o‘zlarining zimmasidagi asosiy vazifalardan tashqari tadbirkorlikni rivojlantirish va investitsiyalarni jalb etish masalasi bilan bevosita shug‘ullanadi. Bu o‘ziga xos Xorazm tajribasi bo‘ladi”, — dedi Shavkat Mirziyoyev.
Izoh (0)