Аввал хабар қилинганидек, Урганч шаҳрида халқ депутатлари Хоразм вилояти кенгашининг навбатдан ташқари сессияси бўлиб ўтди. Унда Ўзбекистон Республикаси Президенти Шавкат Мирзиёев нутқ сўзлади, дея хабар беради ЎзА.
Давлат раҳбарига кўра, 2018—2019 йилларда Хоразм вилоятида умумий қиймати 716 миллион доллар бўлган 1,5 мингга яқин лойиҳани амалга ошириш ва 16 мингта янги иш ўрни яратишга мўлжалланган дастур лойиҳаси ишлаб чиқилди. Шундан қиймати 450 миллион доллар бўлган 478 та лойиҳа ташаббускорларнинг ўз маблағлари ва тўғридан-тўғри хорижий инвестициялар ҳисобидан амалга оширилади. Жорий йилда Қишлоқ хўжалиги корхоналарини таркибий қайта тузиш агентлиги томонидан қиймати 6,7 миллион долларлик 12 та лойиҳа амалга оширилмоқда.
Айни вақтда халқаро молия институтларининг маблағларини жалб этиш ҳисобидан амалга ошириладиган йирик лойиҳалар сони вилоятдаги мавжуд салоҳиятга нисбатан жуда кам. Шу сабабли Хоразм ва Қорақалпоғистон Республикаси учун қишлоқ хўжалик маҳсулотларини етиштириш ва қайта ишлаш бўйича камида 100 миллион долларлик махсус хорижий кредитларни жалб этиш топширилди.
Шавкат Мирзиёев бу борадаги ишларни янада ривожлантириш ва янги босқичга кўтариш мақсадида 2018 йилни Хоразм вилояти учун «Тадбиркорликни тубдан ривожлантириш ва инвестициялар йили» деб эълон қилишни таклиф этди.
Лойиҳа бошқаруви миллий агентлигига Иқтисодиёт вазирлиги, Ташқи савдо вазирлиги ва Инвестициялар бўйича давлат қўмитаси билан биргаликда 10 кун муддатда Хоразм вилоятида тадбиркорлик ва инвестицияларни жалб этиш борасидаги ишларни тубдан такомиллаштириш бўйича Президент қарори лойиҳасини тайёрлаб, тасдиқлаш учун киритиш топширилди.
Мазкур вазирлик ва идоралар раҳбарлари вилоят ва туманлар ҳокимларининг иқтисодиёт бўйича ўринбосарлари билан бирга, чет мамлакатлардаги элчиларни жалб этган ҳолда, бир йилда 15-20 миллион доллар миқдорида инвестициялар олиб келиш учун шахсан масъул этиб белгиланди.
«Вилоят ва туман ҳокимларининг иқтисодиёт бўйича ўринбосарлари ўзларининг зиммасидаги асосий вазифалардан ташқари тадбиркорликни ривожлантириш ва инвестицияларни жалб этиш масаласи билан бевосита шуғулланади. Бу ўзига хос Хоразм тажрибаси бўлади», — деди Шавкат Мирзиёев.
Изоҳ (0)