Selin Dion konsertdan tushgan daromadni Las-Vegasdagi otishma qurbonlarining oila a’zolariga xayriya qildi

Selin Dion o‘z konsertidan tushgan daromadni 1-oktabr kuni Las-Vegasda(Nevada shtati) Stiven Peddok tomonidan otib o‘ldirilgan fuqarolarning oila a’zolarining ehtiyojlariga xayriya qildi, deb xabar beradi “TASS”.

Xonanda mazkur shahardagi konsertlarini fojiadan ikki kun o‘tib davom ettira boshladi.

“Bugungi kecha o‘ziga xos”, — dedi Selin Dion Caesars Palace majmuasidagi “Kolizey” zalida muxlislariga qarata.

“1-oktabr, yakshanba kuni yuz bergan aqlga sig‘maydigan fojiali hodisalardan so‘ng biz o‘z-o‘zimizga bir xil savol bilan murojaat qilmoqdamiz. Dahshatli hodisadan ikki kun o‘tib, Selin Dionning konsertiga borishga jazm qila olishingiz haqida o‘zingizdan so‘ramoqdasiz. Men esa o‘zimga ‘Shouni o‘tkazishga o‘zimda kuch topa olamanmi’, degan savolni beryapman. Bu savollarga javob topish oson emas”, — deydi xonanda.

U konsertini mazkur fojia qurbonlarining yaqinlarini qo‘llab-quvvatlash maqsadida davom ettirayotganini ta’kidladi.

“Biz mazkur fojia oqibatida ko‘plab begunoh insonlarni yo‘qotdik. Bugun biz qurbonlarning oila a’zolariga shunday og‘ir vaziyatda ularga yordam bera olishimizni ko‘rsatamiz. Ular mehrga, ma’naviy taskin va tabiiyki, moliyaviy yordamga muhtoj”, — dedi Selin Dion.