7-oktabr kuni O‘zbekiston Prezidenti Shavkat Mirziyoyevning Rossiya Prezidenti Vladimir Putin bilan telefon orqali muloqoti bo‘lib o‘tdi. Bu haqda davlat rahbarining rasmiy saytida ma’lum qilindi.
Suhbat avvalida Shavkat Mirziyoyev Rossiya Prezidentini tug‘ilgan kuni bilan tabrikladi. Vladimir Putinning ikki mamlakat o‘rtasida strategik sheriklik va ittifoqdoshlikni rivojlantirish, ko‘p qirrali va o‘zaro manfaatli hamkorlikni kengaytirishdagi ulkan shaxsiy hissasini e’tirof qildi.
O‘zbekiston Prezidentining shu yil aprel oyida Rossiyaga amalga oshirgan davlat tashrifi va oliy darajadagi uchrashuvlar ikki tomonlama munosabatlarni mustahkamlagani va amaliy mazmun bilan boyitgani qayd etildi.
Muloqot davomida davlatlar o‘rtasidagi amaliy hamkorlikni yanada kengaytirish masalalari muhokama qilindi. Shuningdek, xalqaro va mintaqaviy siyosatning dolzarb masalalari yuzasidan fikr almashildi.
Rossiya rahbari O‘zbekiston yetakchisi va xalqiga samimiy qutlov uchun minnatdorlik bildirdi. Strategik sheriklik va ittifoqdoshlikka asoslangan O‘zbekiston—Rossiya munosabatlarini yanada mustahkamlash doimo diqqat markazida ekanligini ta’kidladi.
Eslatib o‘tamiz, bugun, 7-oktabr kuni Rossiya prezidenti Vladimir Putin 65 yoshga to‘ldi.
Izoh (0)