“KAMAZ” OAJ O‘zbekistonda yuk mashinalari yig‘ishni yo‘lga qo‘yishni rejalashtirmoqda. Bu haqda O‘zbekiston bosh vazirining o‘rinbosari Nodir Otajonov ma’lum qildi, deb xabar beradi 1News.
Uning so‘zlariga qaraganda, O‘zbekiston va Rossiya qisqa muddatda avtomobil mahsulotlari ishlab chiqarishdagi hamkorlikda katta muvaffaqiyatlarga erishdi.
“‘KAMAZ’ OAJ bilan O‘zbekistonda og‘ir tijoriy avtomobillar yig‘ishni yo‘lga qo‘yish hamda ‘KAMAZ’ning bosh konveyeriga O‘zbekiston komponentlarining yetkazib berilishi bo‘yicha kelishuvga erishildi”, — ma’lum qildi u.
Rossiya yuk mashinasi ishlab chiqaruvchisi bilan hamkorlikning ijobiy jihatlariga tashqi savdo vaziri Elyor G‘aniyev ham urg‘u berdi.
“Biz ‘KAMAZ’ bilan hamkorlikda turli xildagi yuk mashinalarining keng qatorini ishlab chiqarishni yo‘lga qo‘yishni rejalashtirmoqdamiz. Ishonchimiz komilki, bu savdo munosabatlarimiz rivojiga turki beradi, negaki bu loyihalar o‘z ortidan butlovchi qismlar, uskuna va texnologiyalar yetkazilishiga olib keladi”, — dedi vazir.
Izoh (0)