Xalq ta’limi vaziri o‘qituvchilarning terimchi yollashiga munosabatini bildirdi

Xalq ta’limi vaziri Ulug‘bek Inoyatov OAV xodimlari bilan uchrashuvda “Darakchi” muxbirining “O‘qituvchi paxtaga terimchi yollashga majburmi?” degan savoliga javob berdi. 

“Prezident Shavkat Mirziyoyev BMT Bosh Assambleyasi 72-sessiyasida so‘zlagan nutqida bolalar mehnati va majburiy mehnatga barham berilganini jahon minbaridan turib ta’kidlab o‘tdi. Bugungi kunda o‘qituvchi va o‘quvchilar paxtaga chiqishi qat’iyan taqiqlangan. O‘qituvchilar o‘z faoliyati bilan shug‘ullanishi kerak”, — dedi Ulug‘bek Inoyatov. 

Vazirning ta’kidlashicha, terimchi yollashga majburlash holati yuz bersa, bunga nisbatan tegishli choralar ko‘riladi. Xalq ta’limi vazirligining pozitsiyasi ta’lim sifati samaradorligini oshirishga qaratilgan va o‘qituvchilarni bunday holatlardan himoya qilish uchun tegishli normativ hujjatlar bor. Qolaversa, davlat qonunlari ham bunga yo‘l qo‘ymaydi.