Халқ таълими вазири Улуғбек Иноятов ОАВ ходимлари билан учрашувда «Даракчи» мухбирининг «Ўқитувчи пахтага теримчи ёллашга мажбурми?» деган саволига жавоб берди.
«Президент Шавкат Мирзиёев БМТ Бош Ассамблеяси 72-сессиясида сўзлаган нутқида болалар меҳнати ва мажбурий меҳнатга барҳам берилганини жаҳон минбаридан туриб таъкидлаб ўтди. Бугунги кунда ўқитувчи ва ўқувчилар пахтага чиқиши қатъиян тақиқланган. Ўқитувчилар ўз фаолияти билан шуғулланиши керак», — деди Улуғбек Иноятов.
Вазирнинг таъкидлашича, теримчи ёллашга мажбурлаш ҳолати юз берса, бунга нисбатан тегишли чоралар кўрилади. Халқ таълими вазирлигининг позицияси таълим сифати самарадорлигини оширишга қаратилган ва ўқитувчиларни бундай ҳолатлардан ҳимоя қилиш учун тегишли норматив ҳужжатлар бор. Қолаверса, давлат қонунлари ҳам бунга йўл қўймайди.
Изоҳ (0)