Namanganda O‘zbekistondagi birinchi veloyo‘lak foydalanishga topshirildi

Namanganda O‘zbekistondagi birinchi veloyo‘lak foydalanishga topshirildi. Veloyo‘lak O‘zbekiston Ekologik harakati, Yevropada xavfsizlik va hamkorlik tashkilotining O‘zbekistondagi loyihalari koordinatori va Namangan viloyati hokimligi hamkorligida Namangan shahrida barpo etilgan. Bu haqda O‘zA xabar berdi.

Veloyo‘lak YXHTning O‘zbekistondagi loyihalari koordinatorining “Ekologik tashabbuslarni amalga oshirishda O‘zbekiston Respublikasiga ko‘maklashish — faza II” loyihasi doirasida tajriba tariqasida bunyod etilib, kelgusida uni yanada uzaytirish va boshqa viloyatlarda ham barpo etish ko‘zda tutilgan.

Uni tashkil etishdan maqsad atrof-muhit musaffoligini ta’minlash, ekologik zararsiz bo‘lgan velotransportdan foydalanishni keng targ‘ib qilish, uni ommalashtirish va infratuzilmasini rivojlantirish hisoblanadi.

Islom Karimov shohko‘chasi bo‘ylab barpo etilgan veloyo‘lak ochilishi munosabati bilan unda “Shahrimizni birgalikda obod qilaylik!” shiori ostida dastlabki velomarafon o‘tkazildi. Mazkur aksiyada O‘zbekiston Oliy Majlisi Qonunchilik palatasi deputatlari, YXHTning O‘zbekistondagi loyihalari koordinatori vakillari, keng jamoatchilik, velosportchilar, jurnalistlar ishtirok etdi.

Velomarafon ishtirokchilari “Do‘stlik” bozori maydonidan “Yoshlar bog‘i”gacha bo‘lgan 5 kilometrlik masofani bosib o‘tdi. Aksiya ishtirokchilarini yo‘l bo‘ylab mahalliy aholi va yo‘lovchilar qo‘llab-quvvatlab turdi.

Aksiya doirasida O‘zbekiston Ekologik harakati va YXHTning O‘zbekistondagi loyihalari koordinatori tomonidan 80 dan ziyod velosiped viloyatdagi Mehribonlik uyi, maktab-internat, oliy o‘quv yurti, fuqarolarning o‘zini o‘zi boshqarish organi, ekologiya va tibbiyot sohasida faoliyat yuritayotgan nodavlat notijorat tashkilotlari va boshqa ijtimoiy muassasalarga sovg‘a qilindi.

Tadbir doirasida 26-Mehribonlik uyi tarbiyalanuvchilarining mavzuga doir rasmlar tanlovi o‘tkazilib, faol ishtirokchilar diplom va esdalik sovg‘alar bilan taqdirlandi.

Velomarafon viloyat san’atkorlari va yosh iste’dodlar ishtirokidagi konsert dasturi bilan yakunlandi.