Shu kecha-kunduzda xorijiy mamlakatlarning bir necha yuqori martabali vakillari O‘zbekistonda tashrif bilan bo‘lib turibdi. E’tiborli tomoni, bu yuqori martabali delegatsiyalarning kamida uchtasi O‘zbekistonga tashrifini Samarqanddan boshladi.
Janubiy Koreya parlamenti rahbari — Milliy majlis spikeri Chon Se Gyun ham O‘zbekistonda. U boshliq delegatsiya 24-sentabr kuni Samarqandga tashrif buyurib, Islom Karimov qabrini ziyorat qildi, Ulug‘bek rasadxonasi, “Afrosiyob” muzeyi, Go‘ri Amir maqbarasi, Registon maydoni, Bibixonim masjidi, Siyob bozorida bo‘ldi. 25-sentabr kuni esa Chon Se Gyun Toshkentda O‘zbekiston Senati raisi Nig‘matilla Yo‘ldoshev bilan uchrashdi.
25-sentabr kuni boshqa bir mamlakat — Qozog‘iston Parlamenti Senati rahbari Qasim-Jo‘mart To‘qayev O‘zbekistonga tashrifini Samarqanddan boshladi. An’anaga ko‘ra, u ham dastlab Islom Karimov qabrini ziyorat qildi, so‘ng Imom Buxoriy majmuasi, Go‘ri Amir maqbarasi, Registon maydoni, Bibixonim masjidi va Siyob bozorida bo‘ldi. To‘qayev boshliq delegatsiya tarkibida Qozog‘iston prezidentining qizi — senator Darig‘a Nazarboyeva ham bor.
25-sentabr kuni O‘zbekiston Prezidenti Shavkat Mirziyoyev Rossiya qishloq xo‘jaligi vaziri Aleksandr Tkachyovni qabul qildi. O‘zbekistonga 23-sentabr kuni kelgan Tkachyov bungacha qishloq va suv xo‘jaligi vaziri Zoir Mirzayev hamda tashqi savdo vaziri Elyor G‘aniyev bilan muzokaralar o‘tkazgan edi. Rossiya qishloq xo‘jaligi vazirligi ma’lumotlariga ko‘ra, Tkachyov 24-sentabr kuni “Agromir” korxonasi faoliyati bilan tanishgan.
25-sentabr kuni O‘zbekiston Senatida Buyuk Britaniya tashqi ishlar vazirining doimiy kotibi Saymon Makdonald bilan uchrashuv bo‘lib o‘tdi. U ham O‘zbekistonga 23-sentabr kuni yetib kelgan edi. Britaniyalik diplomat safar taassurotlarini Twitter’dagi sahifasida ham o‘rtoqlashib bormoqda. Xususan, u Samarqand Registonini “hayotim davomida ko‘rgan eng chiroyli maydon” deb atadi.
https://twitter.com/SMcDonaldFCO/status/911875679343595521
Izoh (0)