Vazirlar Mahkamasi qarori bilan markaziy tuman (shahar) ko‘p tarmoqli poliklinikalari, shahar va qishloq oilaviy poliklinikalari, qishloq vrachlik punktlari hamda vrachlar va o‘rta tibbiyot xodimlari faoliyati samaradorligini reyting baholash tartibi to‘g‘risida nizom tasdiqlandi. Bu haqda Norma xabar bermoqda.
Joriy yilning 1-oktabridan boshlab yuqorida sanab o‘tilgan tibbiyot muassasalari va ularning tibbiyot xodimlari ishi 100 ballik reyting tizimi asosida baholanadi.
Baholash tegishli tuman (shahar) tibbiyot birlashmasi huzuridagi maxsus monitoring guruhlari tomonidan amalga oshiriladi. U yilda 2 marotaba tibbiyot muassasasining hisobga olish va hisobot hujjatlarini o‘rganish yo‘li bilan o‘tkaziladi.
Reyting baholash o‘z ichiga to‘rt bosqichni oladi:
Birinchi bosqich — birlamchi tibbiy-sanitariya yordami muassasalari vrachlar va o‘rta tibbiyot xodimlarining funksional vazifalarni bajarishining to‘liqligi ko‘rsatkichlari va salbiy ko‘rsatkichlar baholanadi;
Ikkinchi bosqich — birlamchi tibbiy-sanitariya yordami muassasalari faoliyatining to‘laqonligi, sifati va pirovard natijalari ko‘rsatkichlari, shuningdek, salbiy ko‘rsatkichlari baholanadi;
Uchinchi bosqich — vrachlar va o‘rta tibbiyot xodimlari uchun reyting baholashning to‘plangan yakuniy ballaridan kelib chiqib rag‘batlantirish yoki jazolash choralari belgilanadi;
To‘rtinchi bosqich — Sog‘liqni saqlash vazirligi tomonidan reyting baholash natijalari yakunlari bo‘yicha birlamchi tibbiy-sanitariya yordami muassasalari rahbarlarining attestatsiyasi to‘g‘risida qaror qabul qilinadi.
85 va undan ortiq ball to‘plagan patronaj tibbiyot hamshiralari va umumiy amaliyot vrachlari lavozim tarif stavkasiga nisbatan foizlarda moddiy rag‘batlantiriladi:
85 balldan 87 ballgacha — 5 foiz;
87 balldan 91 ballgacha — 10 foiz;
91 balldan 96 ballgacha — 15 foiz;
96 balldan 100 ballgacha — 20 foiz.
Eng yuqori ballarni to‘plaganlarga bir yilda 2 ta maoshdan ortiq bo‘lmagan miqdorda biryo‘la mukofot to‘lanadi. 55 dan 85 ballgacha to‘plaganlar o‘z lavozim maoshini ustamasiz oladi. 55 balldan kam to‘plagan tibbiyot xodimlariga intizomiy jazo choralari qo‘llaniladi.
Izoh (0)