GM Uzbekistan kompaniyasi o‘z rasmiy saytida O‘zbekiston avtosalonlaridan 45 daqiqa ichida sotib olish mumkin bo‘lgan avtomobillarning har kuni yangilanib turuvchi ro‘yxat-jadvalini e’lon qildi.
“45 daqiqada avtomobil!” dasturi doirasidagi jadvaldan GM Uzbekistan’dagi barcha dilerlari (avtosalonlari) o‘rin olgan bo‘lib, ularda har bir diler ixtiyorida 45 daqiqa ichida sotib olish mumkin bo‘lgan Matiz, Spark, Nexia 3, Cobalt va Lacetti avtomobillari soni ko‘rsatilgan.
Misol tariqasida, Toshkent shahridagi Driver’s Village avtosaloni ixtiyoridagi mashinalar ro‘yxatini keltirish mumkin: 26-sentabr holatiga ko‘ra avtosalonda 3 ta Matiz, 53 ta Spark, 30 ta Nexia 3, 21 ta Cobalt va 19 ta Lacetti’dan birini 45 daqiqa ichida sotib olish mumkin.
Ro‘yxatga asoslanib xulosa qilinsa, sentabr oyi uchun aksariyat viloyatlardagi avtosalonlarda Matiz va Lacetti avtomobillari sotuvda qolmagani, butun mamlakat bo‘ylab soni bo‘yicha eng katta zaxiraga (971 ta) ega model Spark bo‘lib turganini ko‘rish mumkin.
“Mazkur taqsimot asosida, avtomobil sotib olish istagidagi mijozlar shartnoma tuzish uchun dilerlik korxonalariga to‘g‘ridan-to‘g‘ri murojaat qilishlari mumkin”, — deyiladi GM Uzbekistan saytidagi axborotda.
Agar diler ixtiyorida “45 daqiqada avtomobil!” dasturi doirasida sotiladigan avtomobillar qolmagan bo‘lsa, mijoz keyingi oylar taqsimoti hisobidan beriladigan avtomobil uchun elektron buyurtmani rasmiylashtirishi mumkin.
“Nuz.uz”ning yozishicha, “45 daqiqada avtomobil!” dasturi bo‘yicha murojaat qilgan mijozlar endi ro‘yxatda ko‘rsatilgan avtomobillarni to‘lov qilgan zahoti olib ketishi mumkin.
Izoh (0)