Шу кеча-кундузда хорижий мамлакатларнинг бир неча юқори мартабали вакиллари Ўзбекистонда ташриф билан бўлиб турибди. Эътиборли томони, бу юқори мартабали делегацияларнинг камида учтаси Ўзбекистонга ташрифини Самарқанддан бошлади.
Жанубий Корея парламенти раҳбари — Миллий мажлис спикери Чон Се Гюн ҳам Ўзбекистонда. У бошлиқ делегация 24 сентябрь куни Самарқандга ташриф буюриб, Ислом Каримов қабрини зиёрат қилди, Улуғбек расадхонаси, «Афросиёб» музейи, Гўри Амир мақбараси, Регистон майдони, Бибихоним масжиди, Сиёб бозорида бўлди. 25 сентябрь куни эса Чон Се Гюн Тошкентда Ўзбекистон Сенати раиси Ниғматилла Йўлдошев билан учрашди.
25 сентябрь куни бошқа бир мамлакат — Қозоғистон Парламенти Сенати раҳбари Қасим-Жўмарт Тўқаев Ўзбекистонга ташрифини Самарқанддан бошлади. Анъанага кўра, у ҳам дастлаб Ислом Каримов қабрини зиёрат қилди, сўнг Имом Бухорий мажмуаси, Гўри Амир мақбараси, Регистон майдони, Бибихоним масжиди ва Сиёб бозорида бўлди. Тўқаев бошлиқ делегация таркибида Қозоғистон президентининг қизи — сенатор Дариға Назарбоева ҳам бор.
25 сентябрь куни Ўзбекистон Президенти Шавкат Мирзиёев Россия қишлоқ хўжалиги вазири Александр Ткачёвни қабул қилди. Ўзбекистонга 23 сентябрь куни келган Ткачёв бунгача қишлоқ ва сув хўжалиги вазири Зоир Мирзаев ҳамда ташқи савдо вазири Элёр Ғаниев билан музокаралар ўтказган эди. Россия қишлоқ хўжалиги вазирлиги маълумотларига кўра, Ткачёв 24 сентябрь куни «Агромир» корхонаси фаолияти билан танишган.
25 сентябрь куни Ўзбекистон Сенатида Буюк Британия ташқи ишлар вазирининг доимий котиби Саймон Макдоналд билан учрашув бўлиб ўтди. У ҳам Ўзбекистонга 23 сентябрь куни етиб келган эди. Британиялик дипломат сафар таассуротларини Twitter’даги саҳифасида ҳам ўртоқлашиб бормоқда. Хусусан, у Самарқанд Регистонини «ҳаётим давомида кўрган энг чиройли майдон» деб атади.
New 50,000 som note = half a new Jane Austen @UKinUzbekistan pic.twitter.com/7b8lN0jfFA
— Simon McDonald (@SimonMcDonaldUK) September 24, 2017
Изоҳ (0)