Avstraliya o‘zining ko‘smik agentligini yaratadi. Bu haqda mamlakat ilm-fan vaziri Misheliya Kesh Xalqaro astronavtika kongressida ma’lum qildi, deb xabar berdi “RBK”.
Vazirning ta’kidlashicha, Avstraliya sun’iy yo‘ldoshlar uchirish va kosmik qurilmalar yordamida olingan ma’lumotlarga xizmat ko‘rsatish maqsadida o‘z kosmik dasturini boshlashi juda muhim ahamiyatga ega.
Shuningdek, vazirning qo‘shimcha qilishicha, Avstraliya tez o‘sib borayotgan kosmik xizmat ko‘rsatish bozorida o‘z o‘rniga ega bo‘lishi lozim, hozirgi vaqtda u 330 milliard dollarga baholanmoqda.
Keshning qayd etishicha, barcha rivojlangan mamlakatlar o‘zining kosmik agentligiga ega, jumladan, o‘tgan yili Yangi Zelandiya ham shu turdagi tashkilotga asos soldi. “Kosmik agentlikning yaratilishi bizning kosmik texnologiyalarni rivojlantirish va qo‘llash borasidagi uzoq muddatli strategiyamiz mavjud ekanligini ko‘rsatadi”, — dedi u.
68-xalqaro astronavtika kongressi joriy yilda Avstraliyaning Adelaida shahrida bo‘lib o‘tmoqda. Unda dunyoning 80 dan ortiq mamlakatidan 4 ming odam ishtirok etmoqda.
Izoh (0)