Aynan qaysi uchrashuvlar shubhaga tushgani haqida OFK bayonotida so‘z bormaydi.
OFK o‘z bayonotida alohida qayd etishicha, tashkilot iyun oyida a’zo mamlakatlarga Osiyo futbolidagi barcha manfaatdor tomonlar siyosiy betaraflik tamoyiliga rioya etishlari lozimligi haqida xat yo‘llagan. Xatda, jumladan, OFK Nizomining 14.4-bandidan iqtibos keltirilgan. Unga ko‘ra, “OFKga a’zo uyushmalar o‘z ishlarini mustaqil va uchinchi tomonlarning asossiz aralashuvisiz yuritishlari lozim”.
5-sentabr kuni JCh—2018 saralashi doirasida Osiyoda olti uchrashuv bo‘lib o‘tdi. Ulardan biri Toshkentda o‘tkazildi — O‘zbekiston milliy termasi Janubiy Koreya bilan 0:0 hisobida durang o‘ynadi. Guruhning ikkinchi o‘yinida Suriya Eron bilan safarda 2:2 hisobida durang o‘ynab, O‘zbekistonni JCh—2018 yo‘llanmasi uchun kurashdan chiqarib yubordi.
Qayd etish joiz, Eron milliy terma jamoasi JCh—2018 saralashining so‘nggi guruh bosqichida Suriyaga qarshi mazkur o‘yinga qadar birorta bahsda (to‘qqizta o‘yinda) o‘z darvozasidan gol olib chiqmagan, o‘z maydonida o‘tgan barcha o‘yinlarda g‘alaba qozongan edi. Suriya Eron darvozasiga g‘alaba teng ikkinchi golini o‘yin oxirida, O‘zbekiston — Janubiy Koreya (0:0) uchrashuvi yakuniga yetganidan so‘ng urgan edi.
Ma’lumot uchun, Eron Suriyada 2011-yildan beri davom etayotgan fuqarolar urushida prezident Bashar Asad boshliq amaldagi hukumatni rasman qo‘llab-quvvatlaydi, IShID va Suriyadagi boshqa isyonchi kuchlarga qarshi kurashda Asad va uning tarafdorlariga moddiy va harbiy ko‘mak ko‘rsatadi.
Izoh (0)