KXDRda Koreya yarim oroli ikkiga bo‘linganidan so‘ng qolgan amerikalik oxirgi qochoq Jeyms Jozef Dresnok 2016-yili, o‘limidan oldin buyuk dohiy Kim Chen Inga sodiqligi haqida gapirgan. Bu haqda uning katta o‘g‘li Singapurning Channel News Asia telekanaliga ma’lum qildi, deya xabar beradi “Interfaks”.
“Respublika otamizga e’tibor qaratardi. U 74 yoshida vafot etguniga qadar partiyadan faqat e’zoz va g‘amxo‘rlik ko‘rdi”, — dedi Ted Dresnok.
1962-yilda Jeyms Dresnok AQSh harbiy tribunalidan qochib, Janub va Shimolni ajratib turgan zonadan o‘tgandi. Unga ko‘ra, bu qarorga kelgan payt boshqa chorasi qolmagan, ustiga-ustak, xotini ham tashlab ketgandi. Shimoliy Koreya askarlari qo‘liga tushganidan so‘ng avvaliga uni otib tashlamoqchi bo‘lishdi, biroq keyin Pxenyanga so‘roq uchun eltishga qaror qilindi.
Jeyms koreys tili va urf-odatlarini o‘rgandi. Ingliz tilidan dars berdi, Shimoliy Koreya rahbarlari asarlarini ingliz tiliga o‘girdi.
Dresnok bu yerda yana bir necha amerikalik qochoqlarni uchratdi. Ularning barchasi olamdan o‘tdi, eng taniqlisi — Charlz Jenkins esa oldinroq yapon rafiqasi bilan Yaponiyaga ko‘chib o‘tgandi.
Izoh (0)