Amerikaliklarning 47 foizi Shimoliy Koreya rahbariyatiga bosim o‘tkazish uchun uning harbiy va yadro obyektlariga aviazarba berilishini qo‘llab-quvvatlaydi. Bu haqda Politico nashri o‘tkazgan so‘rovga tayanib, “RIA Novosti” xabar berdi.
So‘rovda ishtirok etgan amerikaliklarning deyarli uchdan biri Pxenyanni yadro qurollari va raketalar ishlab chiqarishdan voz kechishi uchun quruqlik kuchlarini yuborish tarafdori.
Amerikaliklar orasida Shimoliy Koreya hukumatiga bosim o‘tkazishning eng ommabop yo‘li sifatida diplomatik kuchaytirishlar (78 foiz) va qo‘shimcha sanksiyalarni kiritish (73 foiz) qolmoqda.
Trampning “agar KXDR tomonidan AQShga nisbatan real xavf paydo bo‘ladigan bo‘lsa, unga javob berish” haqidagi va’dasini so‘rovda ishtirok etganlarning 46 foizi qo‘llab-quvvatlagan.
Bundan tashqari, AQSh aholisining 49 foizi Donald Tramp Koreys yarimorolidagi muammoni hal qiladi, deb hisoblaydi. Trampning muammoni hal qilishiga gumon qilayotganlar 42 foizni tashkil qilmoqda.
So‘rovda ishtirok etganlarning 52 foizi Trampning prezidentlik lavozimidagi ishidan norozi. Uning siyosatiga tarafdor bo‘lganlar 44 foizni tashkil qilgan.
Izoh (0)