O‘zMUning ikki talabasi xalqaro matematika olimpiadasida oltin medallarni qo‘lga kiritdi

Bolgariyada 31-iyul—6-avgust kunlari bo‘lib o‘tgan 24-xalqaro matematika olimpiadasida O‘zbekiston milliy universiteti matematika fakulteti 4-kurs talabalari Hakimboy Egamberganov va Shohruh Ibragimov ikkita oltin medalni qo‘lga kiritdi. Bu haqda UZ24 xabar bermoqda.

Universitet axborot xizmatining qayd etishicha, Hakimboy Egamberganov to‘rtinchi marta, Shohruh Ibragimov ikkinchi bor nufuzli xalqaro olimpiadalarning oltin medallariga sazovor bo‘ldi.

Hakimboy Egamberganov ilk bor 2014-yil maktab o‘quvchilari o‘rtasida Olmaota shahrida o‘tkazilgan 10-xalqaro Jautikov olimpiadasida oltin medalga sazovor bo‘lgan. U ikkinchi oltin medalni 2015-yili Bolgariyaning Vlagoyevgrad shahrida talabalar o‘rtasida matematika fani bo‘yicha xalqaro olimpiadada qo‘lga kiritgan.

Mazkur g‘alabasi uchun Hakimboy Egamberganov Buyuk Britaniyaning nufuzli oliy ta’lim muassasasi — University College London va Germaniyadagi matematikaga ixtisoslashgan oliy ta’lim muassasasi magistratura bosqichiga taklif etilgan.

Uning uchinchi oltin medali Kipr davlatining Protaras shahrida matematika fani bo‘yicha o‘tkazilgan 10-xalqaro SEEMOUS—2016 olimpiadasida qo‘lga kiritilgan.

Shohruh Ibragimov esa 2014-yili Bolgariyada bo‘lib o‘tgan xalqaro “Balkan” matematika olimpiadasida kumush medal sohibi bo‘lgan. Kipr davlatida bo‘lib o‘tgan xalqaro olimpiadada esa oltin medal egasiga aylangan.