Болгарияда 31 июль—6 август кунлари бўлиб ўтган 24-халқаро математика олимпиадасида Ўзбекистон миллий университети математика факультети 4-курс талабалари Ҳакимбой Эгамберганов ва Шоҳруҳ Ибрагимов иккита олтин медални қўлга киритди. Бу ҳақда UZ24 хабар бермоқда.
Университет ахборот хизматининг қайд этишича, Ҳакимбой Эгамберганов тўртинчи марта, Шоҳруҳ Ибрагимов иккинчи бор нуфузли халқаро олимпиадаларнинг олтин медалларига сазовор бўлди.
Ҳакимбой Эгамберганов илк бор 2014 йил мактаб ўқувчилари ўртасида Олмаота шаҳрида ўтказилган 10-халқаро Жаутиков олимпиадасида олтин медалга сазовор бўлган. У иккинчи олтин медални 2015 йили Болгариянинг Влагоевград шаҳрида талабалар ўртасида математика фани бўйича халқаро олимпиадада қўлга киритган.
Мазкур ғалабаси учун Ҳакимбой Эгамберганов Буюк Британиянинг нуфузли олий таълим муассасаси — University College London ва Германиядаги математикага ихтисослашган олий таълим муассасаси магистратура босқичига таклиф этилган.
Унинг учинчи олтин медали Кипр давлатининг Протарас шаҳрида математика фани бўйича ўтказилган 10-халқаро SEEMOUS—2016 олимпиадасида қўлга киритилган.
Шоҳруҳ Ибрагимов эса 2014 йили Болгарияда бўлиб ўтган халқаро «Балкан» математика олимпиадасида кумуш медаль соҳиби бўлган. Кипр давлатида бўлиб ўтган халқаро олимпиадада эса олтин медаль эгасига айланган.
Изоҳ (0)