O‘zbekiston fuqarolari MDH mamlakatlari orasida o‘zlarini eng himoyalangan deb his qiladi. Bu haqda Amerikaning Gallup kompaniyasi ma’lumotlari guvohlik bermoqda, deb yozadi UzDaily.
Kompaniya dunyoning 135 dan ortiq mamlakatida yashovchi 136 ming fuqaro ishtirokida o‘zlari yashaydigan tumandagi jinoyatchilik darajasi va mahalliy huquq-tartibot organlari xodimlari ishining ishonchliligi yuzasidan so‘rov o‘tkazdi. Olingan ma’lumotlar tashkilot tomonidan tayyorlangan “Butunjahon qonun va intizom indeksi” uchun asos bo‘ldi.
So‘rov yakunlariga ko‘ra, qonun va intizom indeksi O‘zbekistonda 2016-yil bo‘yicha 95 ballni tashkil etdi. O‘zbekiston ushbu indeksda ikkinchi o‘rinni egalladi, birinchi o‘rinda esa 97 ball bilan Singapur joylashdi.
MDH mamlakatlari ichida ikkinchi pog‘onani Turkmaniston 91 ball (dunyoda 4-o‘rin) bilan, uchinchi o‘rinni esa Ozarbayjon va Gruziya (87 balldan) band etdi.
2016-yil yakunlariga ko‘ra, Tojikistonning indeksi 86 ballga, Armanistonniki — 82, Qozog‘istonniki — 79, Belarusniki — 77, Qirg‘izistonniki — 74, Rossiyaniki — 74 va Ukrainaniki 68 ballga teng bo‘ldi.
Izoh (0)