Ўзбекистон фуқаролари МДҲ мамлакатлари орасида ўзларини энг ҳимояланган деб ҳис қилади. Бу ҳақда Американинг Gallup компанияси маълумотлари гувоҳлик бермоқда, деб ёзади UzDaily.
Компания дунёнинг 135 дан ортиқ мамлакатида яшовчи 136 минг фуқаро иштирокида ўзлари яшайдиган тумандаги жиноятчилик даражаси ва маҳаллий ҳуқуқ-тартибот органлари ходимлари ишининг ишончлилиги юзасидан сўров ўтказди. Олинган маълумотлар ташкилот томонидан тайёрланган «Бутунжаҳон қонун ва интизом индекси» учун асос бўлди.
Сўров якунларига кўра, қонун ва интизом индекси Ўзбекистонда 2016 йил бўйича 95 баллни ташкил этди. Ўзбекистон ушбу индексда иккинчи ўринни эгаллади, биринчи ўринда эса 97 балл билан Сингапур жойлашди.
МДҲ мамлакатлари ичида иккинчи поғонани Туркманистон 91 балл (дунёда 4-ўрин) билан, учинчи ўринни эса Озарбайжон ва Грузия (87 баллдан) банд этди.
2016 йил якунларига кўра, Тожикистоннинг индекси 86 баллга, Арманистонники — 82, Қозоғистонники — 79, Беларусники — 77, Қирғизистонники — 74, Россияники — 74 ва Украинаники 68 баллга тенг бўлди.
Изоҳ (0)