Maxfiy ma’lumotlar chiqib ketishiga AQSh ma’muriyatidagi rasmiylar bilan to‘g‘ridan-to‘g‘ri aloqa bog‘lashga yo‘l bermaydigan muhit sabab bo‘lmoqda. Bu haqda Markaziy razvedka boshqarmasining sobiq rahbari general Maykl Xayden ma’lum qildi, deb xabar beradi “RIA Novosti”.
“Odamlar barcha muqobil variantlardan mahrum bo‘lganda ma’lumotlarni o‘g‘irlaydi. Biz ma’muriyatning o‘zidagi muhit tufayli shunday muammoga duch kelyapmiz. Agar buni istamasangiz, ma’muriyatdagi muhitni o‘zgartiring”, — dedi Xayden CNN kanaliga bergan intervyusida.
Xayden 2006-yilda boshqarmaga ishga kelganida OAVda “MRB dagi manbalar”ga tayanib, tez-tez maxfiy ma’lumotlar paydo bo‘lganini esladi. U qo‘l ostidagilar bilan aloqani yo‘lga qo‘yib, bunday holatlarni qisqartirishga muvaffaq bo‘ldi.
“Siyosatim oddiy edi: xodimlar bilan kommunikatsiyani yo‘lga qo‘yish. Prezidentga bunday tavsiyadan yiroqman, biroq ularga elektron pochtam manzilini bergan va har bir maktubga javob qaytargandim. Ikki hafta davomida mingdan ortiq xat oldim. Shundan keyin ularning soni kamaya boshladi, ma’lumotlarning chetga chiqib ketishi ham”, — ta’kidladi Xayden.
Izoh (0)