Anjelina Joli Bred Pitt bilan ajrashganidan keyingi birinchi intervyusida Kambodjadagi qizil kxmerlar harakatiga bag‘ishlangan “Ular dastlab otamni o‘ldirdi” filmi haqida hikoya qildi. Bu haqda TJournal xabar bermoqda.
Film ssenariysiga Pol Pot hukmronligi davrida genotsidni boshidan kechirgan yozuvchi Lun Unning kitobi asos qilib olindi. Suratga olish guruhi Lun Un roliga aksariyati bolalar uyi, sirklar va internatlarda katta bo‘lgan bir necha bolani tanladi.
Joli ularni bir xonaga yig‘ib, oldilariga pullarni qo‘ydi va bir necha kupyurani o‘g‘irlashni so‘radi. Agar rejissor yoki guruhdan kimdir bolani tutib olsa, u pullar nima uchun kerak bo‘lganini izohlab berishi lozim edi.
Tanlovda o‘g‘irlangan pullar o‘lgan bobosini munosib ko‘mish uchun zarur bo‘lganini bahona qilgan Sri Muchiga nasib etdi. Joliga ko‘ra, g‘aroyib kasting haqiqiy qiyinchiliklarni boshidan kechirgan aktrisani topish uchun kerak bo‘lgan.
Twitter foydalanuvchilari Jolini bolalarga nisbatan shafqatsiz munosabatda aybladi va u 2012-yildan beri BMTning qochqinlar masalalari bo‘yicha elchisi hisoblanishini eslatdi. Film premyerasi 2017-yil fevralida Kambodjada bo‘lib o‘tdi, yil oxirida esa Netflix servisida joylashtiriladi.
Izoh (0)