O‘zbekiston ilk bor fuqarolik aviatsiyasi uchuvchilarini xalqaro standartlar asosida tayyorlaydi. Bosh vazir Abdulla Aripov bu borada tegishli qarorni imzoladi, deb xabar berdi “Kommersant.uz”.
Hujjatga ko‘ra, tayyorgarlik “O‘zbekiston havo yo‘llari” MAK o‘quv-mashq markazida bo‘lib o‘tadi. Mashqlarga oliy texnik ta’limga ega xodimlar tanlab olinadi.
Tayyorlov kurslarining yana bir asosiy vazifasi – fuqarolik aviatsiyasi sohasida xorijiy oliy ta’lim muassasalarining tajribasini tatbiq etgan holda o‘quv rejasi va dasturlarni ishlab chiqish, shuningdek, xorijiy o‘quv markazlari bilan hamkorlik aloqalarini yo‘lga qo‘yishdir.
Kurslar faoliyati “O‘zbekiston havo yo‘llari” MAK tomonidan moliyalashtiriladi.
Eslatib o‘tamiz, bundan avval aviakompaniyada yosh uchuvchilar nazariy bilimni Sankt-Peterburg fuqarolik aviatsiyasi davlat universitetida olib, amaliy tajribani Toshkentdagi MAK o‘quv-mashq markazida o‘tagan.
Bugunga kelib markazda zamonaviy, ko‘p funksiyali aviatsiya trenajyorlari, favqulodda qutqaruv tayyorgarligi kompleksi, shuningdek, fuqarolik aviatsiyasi xodimlarini tayyorlashda xalqaro tajribaga ega o‘qituvchi va murabbiylar bor.
Bu yerda Boeing-757/767, A320 va Il-114-100 Full-flight simulyatori mavjud. Barcha trenajyorlar uchish qurilmalariga qo‘yiladigan zamonaviy talablarga javob beradi. Ushbu uskunalar mashqlarning real sharoitga maksimal ravishda yaqin sharoitda o‘tkazilishiga yordam beradi.
Izoh (0)