Ўзбекистон илк бор фуқаролик авиацияси учувчиларини халқаро стандартлар асосида тайёрлайди. Бош вазир Абдулла Арипов бу борада тегишли қарорни имзолади, деб хабар берди «Коммерсантъ.uz».
Ҳужжатга кўра, тайёргарлик «Ўзбекистон ҳаво йўллари» МАК ўқув-машқ марказида бўлиб ўтади. Машқларга олий техник таълимга эга ходимлар танлаб олинади.
Тайёрлов курсларининг яна бир асосий вазифаси – фуқаролик авиацияси соҳасида хорижий олий таълим муассасаларининг тажрибасини татбиқ этган ҳолда ўқув режаси ва дастурларни ишлаб чиқиш, шунингдек, хорижий ўқув марказлари билан ҳамкорлик алоқаларини йўлга қўйишдир.
Курслар фаолияти «Ўзбекистон ҳаво йўллари» МАК томонидан молиялаштирилади.
Эслатиб ўтамиз, бундан аввал авиакомпанияда ёш учувчилар назарий билимни Санкт-Петербург фуқаролик авиацияси давлат университетида олиб, амалий тажрибани Тошкентдаги МАК ўқув-машқ марказида ўтаган.
Бугунга келиб марказда замонавий, кўп функцияли авиация тренажёрлари, фавқулодда қутқарув тайёргарлиги комплекси, шунингдек, фуқаролик авиацияси ходимларини тайёрлашда халқаро тажрибага эга ўқитувчи ва мураббийлар бор.
Бу ерда Boeing-757/767, A320 ва Ил-114-100 Full-flight симулятори мавжуд. Барча тренажёрлар учиш қурилмаларига қўйиладиган замонавий талабларга жавоб беради. Ушбу ускуналар машқларнинг реал шароитга максимал равишда яқин шароитда ўтказилишига ёрдам беради.
Изоҳ (0)