“Ijtimoiy fikr” markazi tomonidan 2017-yilning 5—14-iyul kunlari “Fuqarolar O‘zbekiston Respublikasi Prezidenti to‘g‘risida” mavzusida jamoatchilik fikri ekspress-so‘rovi o‘tkazildi. Bu haqda “Daryo”ga markaz mutasaddilari ma’lum qildi.
So‘rovdan ko‘zlangan maqsad Prezident Shavkat Mirziyoyevning faoliyati to‘g‘risida mamlakat fuqarolari fikri va O‘zbekistonliklarning davlat rahbariga bo‘lgan ishonchi reytingini aniqlash bo‘ldi.Ekspress-so‘rov natijalari quyidagi xulosalarga kelishga imkon berdi:
O‘zbekistonliklarning ko‘pchiligi — 89,7 foizi Prezident Shavkat Mirziyoyev rahbarligida amalga oshirilayotgan davlat siyosatining asosiy yo‘nalishlarini har tomonlama qo‘llab-quvvatlaydi. Davlat rahbarining mamlakatni modernizatsiyalash, davlat va jamiyat hayotini jadal rivojlantirish uchun shart-sharoitlar yaratish, hayotning barcha sohalarini liberallashtirish, aholining turmush darajasi va sifati, fuqarolarning farovonligini oshirishga qaratilgan ijtimoiy-iqtisodiy islohotlarni amalda ro‘yobga chiqarish bo‘yicha tashabbuslari va chora-tadbirlarini yuksak baholaydi.
So‘rovning ko‘plab qatnashchilari — 83,5 foizi davlat rahbari o‘tkazayotgan siyosat aholining orzu-umidlariga mos keladi, degan fikrni bildirdi. O‘zbekistonliklar Prezident tomonidan mamlakat iqtisodiyoti, ijtimoiy soha, tibbiyot, axborot-kommunikativ texnologiyalar, sanoatni modernizatsiyalash va investitsiyalarni jalb qilish, sud-huquq tizimi, fermerlik va tadbirkorlikni rivojlantirish bo‘yicha ko‘rilayotgan chora-tadbirlardan to‘la darajada qoniqadi.
Jamoatchilik fikri ekspress-so‘rovi o‘zbekistonliklarning Shavkat Mirziyoyevning Prezident lavozimidagi faoliyati mamlakatni yanada ijtimoiy-iqtisodiy rivojlantirish, tinchlik va barqarorlikni mustahkamlash, O‘zbekistonning xalqaro maydondagi nufuzini o‘stirish, xalq farovonligini oshirishga yordam berishiga bo‘lgan qat’iy ishonchini aniqlab berdi. Tadqiqot mamlakat fuqarolarining yuqori optimizmi va davlatning kelajagiga yuksak ishonchini qayd etdi.
Aksariyat ko‘pchilik (ishtirokchilarning 89,2 foizi) fikriga ko‘ra, fuqarolar bilan faol va ochiq muloqot olib borish, xalq qabulxonalari shaklida jismoniy va yuridik shaxslarning murojaatlari bilan ishlash bo‘yicha yangi tizimning joriy qilinishi ijtimoiy adolatni ta’minlaydi va aholi hayotining barcha sohalaridagi muammolarni hal qilishning samarali mexanizmi bo‘lib hisoblanadi. Vazirliklar va idoralar, turli darajadagi hokimiyat organlarining faoliyatiga nisbatan aholi keng tabaqalari, har bir fuqaroning ishonchini oshiradi.
Jamoatchilik fikrini o‘rganish Shavkat Mirziyoyevning aholi o‘rtasida o‘sib borayotgan obro‘si va nufuzini tasdiqladi. So‘rov jarayonida fuqarolarning mutlaq ko‘pchiligi — 92,4 foizi Prezident xalq o‘rtasida yuksak obro‘-e’tibor va ishonchga sazovorligi, o‘zbekistonliklar tomonidan qo‘llab-quvvatlanishga munosib mamlakat yetakchisi ekanligini bildirdi.
Izoh (0)