“Daryo” internet-nashrida 22-iyul kuni zangiotalik uy bekasi Dildora Sharipovaning Zangiota tuman yuqumli kasalliklar shifoxonasidagi vaziyat yuzasidan bildirgan fikrlari e’lon qilingan edi. Uy bekasi shifokorlardan shikoyati yo‘qligini, biroq tibbiyot muassasasining o‘zi og‘ir ahvolda ekanini ta’kidlagan, xususan, bemorlar quyosh botganidan so‘ng birinchi qavat tomida yotishga majbur bo‘lganini ma’lum qilgan edi.
Mavzuga doir: “Shifokorlari yaxshi, lekin shifoxona abgor”. Zangiotadagi bemor bolalari tomda yotadigan tibbiyot muassasasi haqida
Zangiota tumanida 400 mingdan ziyod aholi istiqomat qiladi va aholi soni kundan kunga oshib bormoqda. Maqolada keltirilgan yuqumli kasalliklar shifoxonasi moslashtirilgan binoda joylashgan bo‘lib, shu kungacha ichki imkoniyatlar hisobidan joriy ta’mirlab kelinmoqda edi.Ayni vaqtda, “Daryo” internet-nashriga Zangiota tuman yuqumli kasalliklar shifoxonasining birinchi qavatida olib borilayotgan ta’mirlash ishlari aks etgan fotosuratlar taqdim etildi.Bosh shifokorning tuman rahbariyatiga murojaati asosida, 2017-yilda shifoxonaning birinchi qavatida joylashgan bolalar bo‘limini rekonstruksiya qilish va mukammal ta’mirlash ishlari uchun 100 million so‘mdan ortiq mablag‘ ajratildi va bugungi kunda bu ishlar jadal olib borilmoqda. Ushbu bo‘limda palatalar boks shaklida (kirish-chiqish alohida, har bir palatada yuvinish uchun alohida joy) qayta tuzilmoqda.
Tumanda yuqumli kasalliklar shifoxonasi bitta bo‘lgani va yoz faslida oshqozon-ichak kasalliklari ko‘p miqdorda qayd etilishini inobatga olib, ta’mirlash davrida shifoxonani qisman faoliyatini davom ettirish maqsadga muvofiq deb topildi. 2018-yilda shifoxonaning maqolada suratlari keltirilgan ikkinchi qavatida ham rekonstruksiya va ta’mirlash ishlarini o‘tkazish rejalashtirilgan.
Tuman deputatlarining ham shifoxonadagi sharoitlarni yaxshilash bo‘yicha hukumat organlariga qilgan murojaatlariga javoban, mazkur muassasa uchun barcha qulayliklarga ega zamonaviy bino qurilishi maqsadga muvofiq deb topilgan bo‘lib, hozirda loyiha ishlari ko‘rilmoqda.
Maqola muallifidan shifoxonadagi muammolarga e’tiborli bo‘lgani, tibbiy xodimlar xizmatiga xolis baho bergani uchun minnatdorchilik bildirib, yozning o‘ta issiq kunlarida imkoniyatimizdan tashqari holda yetkazilgan noqulayliklar uchun uzr so‘raymiz. “Daryo” muxbirlariga ham aholini sifatli tibbiy xizmat bilan ta’minlashga qaratgan e’tiborlari uchun minnatdorchilik bildiramiz.
Maqsuda Varisova, senator
Boks palatalarda kirish-chiqish yo‘llari alohida bo‘ladi
Palatalar sovitish moslamalari bilan jihozlanmoqda
Palatalar keng va yorug‘ bo‘ladi, ularga ikki nafardan bemor joylashtiriladi
Ta’mirlash ishlari 2017-yil 1-sentabrga qadar yakunlanadi
Izoh (0)