AQSh sug‘urta sohasidagi jinoyatlar bo‘yicha milliy byurosi (NICB) 2016-yilda avtomobillarning o‘g‘rilab ketilishi statistikasini e’lon qildi. Bu haqda “Motor” xabar bermoqda.
Mamlakatdagi eng ko‘p olib qochiladigan mashinalar Xondaning eski modellari, jumladan, 1997-yilgi Accord va 1998-yilda chiqarilgan Civic bo‘ldi. Mazkur modifikatsiyalarga 15 mingga yaqin o‘g‘irlik to‘g‘ri keldi.
Ular umumiy ro‘yxatda ham peshqadamlik qilmoqda: Accord va Civic’ning barcha yillardagi modellaridan taxminan 50 mingtadan olib qochilgan. Top-uchlikni Ford pikaplari yakunlab berdi (32 721).
Shuningdek, “nufuzli” o‘nlikka Chevrolet pikaplari (31 238), Toyota Camry (16 732), Nissan Altima (12 221), Dodge pikaplari (12 128), Toyota Corolla (11 989), Chevrolet Impala (9 749) va Jeep Cherokee/Grand Cherokee (9 245) ham kirdi.
Jinoyatchilar o‘rtasida eski avtomobillar mashhurligini NICB ularning olib qochishga qarshi zamonaviy tizimlarga ega emasligi bilan izohladi. Shuningdek, eski mashinalar ko‘pincha ehtiyot qismlarga ajratiladi.
AQShda o‘tgan yili jami 757 850 mashina o‘g‘rilandi. Bu 2015-yilga nisbatan 7 foizga ko‘p.
Izoh (0)