Rossiya prezidentining bo‘lg‘usi limuzini haqidagi tafsilotlar ma’lum qilindi

“Kortej” loyihasi doirasida Rossiya prezidenti uchun yaratilayotgan limuzin 850 ot kuchiga teng 12 silindrli dvigatelga va to‘qqiz pog‘onali avtomatik transmissiyaga ega bo‘ladi. Bu haqda “TASS”ga istiqbolli texnologiyalar va taraqqiyot bo‘limi boshlig‘i Kirill Kazmirchuk ma’lum qildi.

Uning so‘zlariga ko‘ra, loyiha doirasida dvigatellarning butun bir lineykasi ishlab chiqilmoqda. “Eng kuchli dvigatel — V12 850, V8 — 650 va 4 silindrli dvigatel esa 250 ot kuchiga teng”, — deya aniqlik kiritdi u.

Amaldor qo‘shimcha qilishicha, V12 yengil va “og‘ir”, ya’ni, zirhli limuzinlarga o‘rnatiladi. V8 va V12 yo‘ltanlamaslarga, L4 va V8 esa mikroavtobuslarga o‘rnatiladi.

Avtomobillar uchun hozircha bitta transmissiya yaratilgan, bu — to‘qqiz pog‘onali “avtomat”.

“Kortej” loyihasi lyuks avtomobillar — limuzin, sedan, yo‘ltanlamas, minivenlarning modellar qatorini yaratishni ko‘zda tutadi.