11-iyul kuni Toshkent va Samarqandni bog‘laydigan M-39 avtoyo‘lining Qozog‘istonning Maqtaorol tumanidan o‘tadigan uchastkasidan birinchi avtomobillar o‘tdi. Bu haqdagi lavha “O‘zbekiston” telekanalining “Axborot” dasturida ko‘rsatildi, deb xabar beradi “Gazeta.uz”.
Shu kundan O‘zbekiston–Qozog‘iston davlat chegarasida joylashgan “Malik” (“Sirdaryo”) va “Oq oltin” (“Selinniy”) avtomobil o‘tkazish punktlari ishlay boshladi.
M-39 yo‘lining Qozog‘istondan o‘tadigan 25 kilometr uzunlikdagi uchastkasi 2006-yili yopilgan edi. Uning ochilishi ikki mamlakat rahbarlarining kelishuvlari tufayli amalga oshdi.
Ochilish marosimida O‘zbekiston bosh vazirining o‘rinbosari Ulug‘bek Ro‘zuqulov, Sirdaryo viloyati hokimi G‘ofurjon Mirzayev va boshqa rasmiy shaxslar qatnashdi. Qozog‘iston tomonidan Qozog‘iston bosh vazirining investitsiyalar va rivojlanish bo‘yicha o‘rinbosari Roman Sklyar, Janubiy Qozog‘iston viloyati hokimi Janseit Tuymebayev, Qozog‘istonning Toshkentdagi elchisi Yerik Utembayev va boshqalar marosimda qatnashdi.
O‘zbekiston Prezidentining 26-apreldagi qaroriga muvofiq, uchastkaning ochilishi 15-mayga mo‘ljallangan edi, ammo ushbu sana ortga surildi. Yo‘ldan faqat yengil avtotransport o‘tishi mumkin, tijoriy maqsadlarda yuk va tovarlar olib o‘tish taqiqlangan.
Maqtaorol tumaniga to‘xtovsiz tranzit bilan boruvchi O‘zbekiston fuqarolari osonlashtirilgan tartibda o‘tkaziladi — chegaradan o‘tish belgilari qo‘yilmaydi. Davlat chegarasidan o‘tish huquqini beruvchi shaxsni tasdiqlovchi hujjatlar talab etiladi.
Qozog‘istonga notranzit maqsadlarda boruvchi O‘zbekiston fuqarolariga, shuningdek, Qozog‘iston fuqarolariga nisbatan chegara nazorati qonunchilikda belgilangan tartibda hamda O‘zbekistonning xalqaro kelishuvlariga binoan amalga oshiriladi.
Bojxona nazorati osonlashtirilgan tartibda amalga oshiriladi, bojxona deklaratsiyasi to‘ldirilishi, transport vositalarining ro‘yxatga olinishi va bojxona nazoratidan o‘tkazilishi talab etilmaydi, lekin ular vizual ko‘zdan kechiriladi.
Izoh (0)