11 июль куни Тошкент ва Самарқандни боғлайдиган M-39 автойўлининг Қозоғистоннинг Мақтаорол туманидан ўтадиган участкасидан биринчи автомобиллар ўтди. Бу ҳақдаги лавҳа «Ўзбекистон» телеканалининг «Ахборот» дастурида кўрсатилди, деб хабар беради «Газета.uz».
Шу кундан Ўзбекистон–Қозоғистон давлат чегарасида жойлашган «Малик» («Сирдарё») ва «Оқ олтин» («Целинний») автомобиль ўтказиш пунктлари ишлай бошлади.
M-39 йўлининг Қозоғистондан ўтадиган 25 километр узунликдаги участкаси 2006 йили ёпилган эди. Унинг очилиши икки мамлакат раҳбарларининг келишувлари туфайли амалга ошди.
Очилиш маросимида Ўзбекистон бош вазирининг ўринбосари Улуғбек Рўзуқулов, Сирдарё вилояти ҳокими Ғофуржон Мирзаев ва бошқа расмий шахслар қатнашди. Қозоғистон томонидан Қозоғистон бош вазирининг инвестициялар ва ривожланиш бўйича ўринбосари Роман Скляр, Жанубий Қозоғистон вилояти ҳокими Жансеит Туймебаев, Қозоғистоннинг Тошкентдаги элчиси Ерик Утембаев ва бошқалар маросимда қатнашди.
Ўзбекистон Президентининг 26 апрелдаги қарорига мувофиқ, участканинг очилиши 15 майга мўлжалланган эди, аммо ушбу сана ортга сурилди. Йўлдан фақат енгил автотранспорт ўтиши мумкин, тижорий мақсадларда юк ва товарлар олиб ўтиш тақиқланган.
Мақтаорол туманига тўхтовсиз транзит билан борувчи Ўзбекистон фуқаролари осонлаштирилган тартибда ўтказилади — чегарадан ўтиш белгилари қўйилмайди. Давлат чегарасидан ўтиш ҳуқуқини берувчи шахсни тасдиқловчи ҳужжатлар талаб этилади.
Қозоғистонга нотранзит мақсадларда борувчи Ўзбекистон фуқароларига, шунингдек, Қозоғистон фуқароларига нисбатан чегара назорати қонунчиликда белгиланган тартибда ҳамда Ўзбекистоннинг халқаро келишувларига биноан амалга оширилади.
Божхона назорати осонлаштирилган тартибда амалга оширилади, божхона декларацияси тўлдирилиши, транспорт воситаларининг рўйхатга олиниши ва божхона назоратидан ўтказилиши талаб этилмайди, лекин улар визуал кўздан кечирилади.
Изоҳ (0)